नेकपा एमाले बाहविसे नगर प्रमुखमा तीन जनाको नाम सिफारिस
आसन्न स्थानीय तहको निर्वाचनमा सिन्धुपाल्चोकको बाह्रविसे नगरपालिका प्रमुखमा तीन जनाको नाम सिफारिस भएको छ । नगर कमिटीको दुई दिनसम्म चलेको बैठकले तीन जनाको नाम सिफारिस गर्ने निर्णय गरेको हो । बाह्रबिसेमा सम्पन्न नगर कमिटीको बैठकमा सर्वसम्मत नाम तय हुन नसकेपछि एक महिलासहित नाम जिल्ला कमिटीमा पठाईएको नगर सचिव राजकुमार सुवेदीले जानकारी दिए । नगर प्रमुखमा सात जनाको दावी भएपनि नाम छाटेर तीन जनाको नाम सिफारिस गरिएको हो । केही सञ्चारमाध्यमले सर्वसम्मतमा नाम एकजनाको मात्र सिफारिस गरिएको भन्दै समाचार लेखेको र त्यसो नभएको नगर अध्यक्ष ज्ञानेन्द्र राउतले सामाजिक सञ्जालमा लेखेका छन् ।
बैठकपछि हालका नगरप्रमुख निमफुञ्जो शेर्पा, एमाले जिल्ला सचिवालय सदस्य युद्धबिक्रम तामाङ (डिबी ) र कल्याणी घिसिङको नाम पठाईएको नगर कमिटिको माईन्युटमा लेखिएको छ । आफू पनि नगरप्रमुखको दावीमा रहेका तर, पछिल्लो समय दावी छोडेको अध्यक्ष राउतले बताए । उपप्रमुखमा भने बर्तमान उपप्रमुख सुशीला पाख्रिनको नाम पठाईएको छ । सर्वसहमत गर्ने प्रयास भएपनि त्यो सफल हुन सकेन ।
