नेकपा एसका उपाध्यक्ष केसीसहित सिंगो टीम एमालेमै फर्कियो
स्थानीय तहको निर्वाचनको मिति नजिकिदै जाँदा दोलखामा माधव नेपाल नेतृत्वको नेकपा एकीकृत समाजवादी पार्टी रित्तिन थालेको छ । माधव नेपालतिर लागेर जिल्लामा पार्टी बनाउन जुटनु भएका प्रभावशाली नेता तथा नेकपा एसका उपाध्यक्ष भुवन केसी आज आफ्नो सिंगो टीमसहित नेकपा एमालेमै फर्कनु भएको छ ।
माधव नेपालले छरेको भ्रममा परेर नयाँ पार्टी बनाउन लागेको तर माधवको चाहना कांग्रेसको सेवा गर्ने रहेको तथ्य आफूले बुझेपछि सिंगो टीमसहित एमालेमै फर्किएको केसीले बताउनु भयो । यसैगरी समाजबादिका युवा सघका केन्द्रीय सदस्य श्याम तामाङ पनि सिंगो टीमसहित एमालेमै फर्कनु भएको छ ।
केसी र तामाङसहितका नेताहरुलाई एमाले पोलिटब्यूरो सदस्य तथा पूर्वसञ्चारमन्त्री पार्वत गुरुङसहित केन्द्रीय सदस्य तथा दोलखा इञ्चार्ज सरस्वती बस्नेत, जिल्ला अध्यक्ष नरबहादुर श्रेष्ठलगायतका एमाले नेताहरुले स्वागत गर्नुभएको छ ।
दोलखा एमालेले नेता गुरुङको नेतृत्वमा समाजवादी र माओवादीतिर लागेका सवै नेता कार्यकर्ता फर्काउने अभियान नै चलाएको छ। यसक्रममा जिल्लाका सवै वडामा नेकपा एक रित्तिदै गएको छ भने माओवादीका चर्चित नेताहरु पनि एमालेतिर आउनु भएको छ ।
