प्रकाशमान र विमलेन्द्रको आ-आफ्नै दाउ, रामचन्द्रलाई सभापतिको भाउ
प्रकाशमान सिंहलाई महामन्त्रीको उम्मेदवार हुनबाट रोक्न विमलेन्द्र निधीले नयाँ प्रस्ताव अघि सारेका छन । महाधिवेशनको पूर्वसन्ध्यासम्म पनि चुपचाप रहेका निधीले शुक्रबार रामचन्द्र पौडेललाई सभापतिमा सर्वसम्मत उम्मेदवार बनाउन प्रस्ताव गरेका छन ।
उनले पौडेल समूहमा सभापतिको उम्मेदवारको विषयलाई लिएर भैरहेको विवादलाई नयाँ मोड दिन खोजिएको बुझिएको छ । प्रकाशमान र विमलेन्द्र दुबै कांग्रेसको महामन्त्री र उपसभापति भैसकेका व्यक्ति हुन । सिंह गणेशमानका पुत्र हुन भने निधी महेन्द्रनारायणका पुत्र हुन ।
निधीले शुक्रबार बिहान ललितपुरमा भएको एउटा भेलामा सम्बोधन गर्दै पौडेलको पक्षमा खुल्ने स्पष्ट संकेत दिएका हुन । देउवा समूहका नेता मानिएका निधि आफैँ सभापतिको उम्मेदवार बन्ने भन्दै चारपाँच महिनाअघि देखि मिडियामा छाएका थिए । उनले बानेश्वरको एक पार्टी प्यालेसलाई सम्पर्क कार्यालय बनाएर आफ्नो गतिबिधि सञ्चालन गर्दै आएका थिए ।
आफैँ सभापतिको दौडमा रहेको एक करोड भन्दा बढी सम्पर्क कार्यालयका नाममा खर्च गरिसकेका निधीले अन्तिमसम्म आएर पौडेलको नाम लिनुलाई रहस्यमय ढंगले हेरिएको छ । धेरैले उनले सिंहलाई रोक्नका लागि यस्तो प्रस्ताव गरेको बुझेका छन ।
