कांग्रेस महाधिवेशन बहिष्कार गर्ने रामचन्द्र पाैडेलको निर्णय
नेपाली कांग्रेसका वरिष्ठ नेता रामचन्द्र पौडेलले चौधौँ महाधिवेशनको उद्घाटन नै बहिष्कार गर्ने भएपछि उनलाई मनाउन नेताहरू बोहोराटारस्थित उनको निवासमा पुगेका छन । पौडेललाई मनाउन यसअघि देउवाको गुटमा लागेर सभापतिमा हराउन कस्सिएका अर्जुननरसिंह केसीसहितका नेता रहेका छन । अघिल्लो महाधिवेशनमा देउवा गुटबाट महामन्त्रीको उम्मेदवार बनेर केसीले सभापतिमा देउवालाई सहयोग गरेका थिए ।
अहिले भने केसी पौडेल समूहमा लागेका छन । केसीसहित पौडेल निवासमा महेश आचार्य, बलबहादुर केसी र डा मिनेन्द्र रिजाल पुगेका छन । उनीहरूले पौडेललाई महाधिवेशनको उद्घाटनसत्रमा उपस्थित भैदिन अनुरोध गर्ने एक नेताले बताएका छन । यता सभापतिका अर्का आकांक्षी विमलेन्द्र निधीले पनि पौडेललाई टेलिफोन मार्फत महाधिवेशनको उद्घाटनमा सहभागि भैदिन अनुरोध गरेका छन । आजै बिहान भएको एक कार्यक्रममा सम्बोधन गर्दै निधीले सबैले पौडेललाइ छाडिदिए आफू पनि छाडिदिन तयार रहेको बताएका थिए ।
