प्रचण्डले आफैलाई होच्याइरहेका छन् : सूर्य थापा
नेकपा एमालेका केन्द्रीय सदस्य सूर्य थापाले पूर्वप्रधानमन्त्री समेत रहेका माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्नो कद आफै घटाइरहेको बताएका छन् ।
भरतपुरमा आज सोमबार प्रेस चौतारी नेपाल, जिल्ला समिति चितवनले गरेको पत्रकार सम्मेलनमा थापाले प्रचण्डको नाम उच्चारण नगरीकनै यस्तो टिप्पणी गरेका हुन् । ‘म उहाँको नाम लिन चाहन्नँ,’ थापाले भने, ‘उहाँ हाम्रो पार्टीको दशौं महाधिवेशनप्रति खुशी हुनुहुन्न, छटपटाहट भइरहेको छ । शुभकामना समेत दिन आउन सक्नुभएन । यसले उहाँको कद अझ घटेको छ ।’
धेरै बेखुश नभइ एमालेको ऐतिहासिक महाधिवेशनमा उपस्थित भएर शुभकामना दिने हिम्मत प्रचण्डले देखाएको भए राजनीतिक रुपमा उनको कद बढ्ने थापाको भनाइ छ । ‘हाम्रो महाधिवेशन घोषणादेखि नै उहाँ बेखुश हुनुभयो, उहाँमा अहिले पनि छटपटाहट भइरहेको हामी पाउँछौं, यसबाट उहाँले आफैलाई होच्याइरहनुभएको छ, यत्तिको नेताले त्यसो नगरेको भए हुन्थ्यो,’ थापाले भने ।
एमालेको दशौं राष्ट्रिय महाधिवेशनबाट देश नै खुशी बन्दा माओवादी अध्यक्ष प्रचण्डमात्रै बेखुशी रहेको थापाको भनाइ छ । थापाले भने, ‘एमालेको महाधिवेशनले आफू र आफ्नी छोरीको राजनीति समाप्त हुने डर उहाँको मनमा छ, तर हाम्रो उद्देश्य त्यस्तो छैन । किनभने उहाँ यसअघि पनि हाम्रै मतले जितेर अहिले जनप्रतिनिधि बन्नु भएको छ ।’
एउटा उचाइमा पुगिसकेको नेताले कुण्ठा र इर्ष्या पालेर अरुप्रति नकारात्मक दृष्टिकोण बनाउनु आफूले आफैंलाई होच्याउनु र कद घटाउनु भएको थापाको टिप्पणी छ ।
