उम्मेदवारी फिर्ता लिने तयारीमा भीम रावल
सर्वसम्मत नेतृत्व चयन गर्ने भनिएको एमालेको दशौं राष्ट्रिय महाधिवेशनमा अध्यक्ष पदमा उम्मेदवारी घोषणा गरेका भीम रावल उम्मेदवारी फिर्ता लिने तयारी गरेको स्रोतको दाबी छ । ओलीको अगाडी पत्तासाफ हुने देखेपछि उनले यस्तो निर्णय गर्न लागेको स्रोतको दाबी छ ।
उता नेकपा एमालेका केन्द्रीय सदस्य एवम् पूर्वमन्त्री महेश बस्नेतले रावलाई आफ्नो उम्मेदवारी फिर्ता लिन आग्रह गरेका हुन् । बस्नेताले पत्रकार सम्मेलन आयोजना गरी सचिव पदमा आफ्नो उम्मेदवारी घोषणा गर्दै रावललाई भने फिर्ता लिन आग्रह गरेका हुन् ।
‘उहाँले दुई कारणले उम्मेदवारी दिएको हुनसक्छ । एउटा अध्यक्षको दाबी गर्दै पार्टीका अन्य भूमिका, पदमा स्थापित गराउन चाहेको पनि हुनसक्छ । दोस्रो, अध्यक्षमा उम्मेदवारी दिने अनि जित्ने कुनै सम्भावना छैन् । तर, पराजित भए पनि पार्टीमा बसेर काम गर्नका लागि पनि हुनसक्छ, भीम रावलले अध्यक्षमा दाबी गरेर एउटा राम्रो सन्देश गएन,’ बस्नेतले भने, ‘ उहाँले उम्मेदवारी फिर्ता गरेर जानुपर्छ ।’
पछिल्लो समय रावलले उत्तेजक खालको अभिव्यक्ति दिएर आम कार्यकर्ता र जनतामा निराशा र अराजकता सृजना गरेको आरोप लगाउँदै उनले भने, ‘विद्यावारिधि गरेको व्यक्तिलाई अहिले आम मानिसले फरक खालले हेर्ने दृष्टिकोण बन्दैछ । कम्युनिष्ट आन्दोलनलाई थप क्षति नहोस् भनेर रावलले उम्मेदवारी फिर्ता लिँदा नै राम्रो हुन्छ ।’
