एमाले स्थायी कमिटी बैठकमा मनोनित प्रतिनिधिबारे छलफल
नेकपा एमालेको स्थायी कमिटी बैठक ललितपुरको च्यासलस्थित तुलसीलाल प्रतिष्ठानमा जारी छ । आगामी १० गतेदेखि चितवनमा शुरू हुने पार्टीको दशौं राष्ट्रिय महाधिवेशनको तयारीबारे विशेष छलफल गर्न बैठक बसिरहेको एमालेले जनाएको छ । एमाले केन्द्रीय कार्यालयका सचिव शेरबहादुर तामाङका अनुसार निर्वाचित भएर आएका बाहेक पाँच प्रतिशत महाधिवेशन प्रतिनिधि समेत आजको बैठकले मनोनित गर्ने तयारी भइरहेको छ ।
पाँच प्रतिशत प्रतिनिधि मनोनित गर्ने स्थायी कमिटीको प्रस्तावलाई केन्द्रीय कमिटीले अनुमोदन गर्ने छ । एमालेको १०औं राष्ट्रिय महाधिवेशनमा २ हजार महाधिवेशन प्रतिनिधि सहभागी हुँदैछन् । एमालेले १ हजार ९०० भन्दा बढी महाधिवेशन प्रतिनिधि चयन गरिसकेको छ ।
