केपी ओलीको विकल्प छैन : प्रभु साह

नेकपा एमालेका नेता तथा पूर्वमन्त्री प्रभु साहले देश र पार्टी भित्र केपी शर्मा ओलीको विकल्प नरहेको बताएका छन् ।  रौतहटको विजयपुरमा आयोजित फतुवा विजयपुर एमालेको प्रथम नगर अधिवेशनको उद्घाटन कार्यक्रमलाई सम्बोधन गर्दै नेता साहले देशलाई अग्रगमनतर्फ डोर्याउन र समृद्ध नेपाल निर्माण गर्न ओलीकै नेतृत्वमा देश र पार्टी अगाडि बढ्ने जीकिर गरे ।

देशमा दलाल प्रतिक्रियावादीहरु एकताबद्ध भएर मुलुकलाई बन्धक बनाउने दुस्साहस गरिरहेको बताउदै पूर्वमन्त्री साहले केपी ओलीको नेतृत्वमा देशलाई अगाडि बढाउन आह्वान गरे । विश्वमा नै कम्युनिष्ट टुटफुट र विघटनको सिकार भइरहेको अवस्थामा केपी ओलीले नेपालमा कम्युनिष्टप्रति आकर्षण बढाएको जीकिर गर्दै उनले केही दक्षिणपन्थी अवसरवादीहरुको बहिर्गमन पछि एमालेमा शुद्धिकरण भएको र सच्चा कम्युनिष्टहरु ओलीकै साथमा रहेको बताए ।

‘अहिले विश्व कम्युनिष्ट आन्दोलन रक्षात्मक अवस्थामा छ, विश्वका कम्युनिष्ट पार्टीहरु टुटफुट र विघटनको अवस्थामा छ तर नेपालमा केपी ओलीको नेतृत्वमा शान्तिपूर्ण ढंगले मतदानमार्फत कम्युनिष्ट पार्टीमाथि अपार उत्साह बढेको हो । यसले विश्वभरको कम्युनिष्टहरुलाई पाठ सिक्न बाध्य बनाएको छ । तर केही दक्षिणपन्थी अवसरवादीहरुले कम्युनिष्ट विचारलाई बदनाम गर्न खोजिरहेका थिए उनीहरु यहाँबाट बहिर्गमन भइसकेको छ, पार्टीको शुद्धिकरण भइकेको छ’ साहले भने ।

उनले अगाडी भने, ‘अब नेकपा एमाले र देश दुबैको नेतृत्व कमरेड केपी ओलीको नेतृत्वमा अगाडि बढ्छ । लामो समय देखि विद्यमान गरिबी र पछौटेपनबाट ग्रसित नेपाललाई विकसित बनाउन उहाँले दिनुभएको एउटा नयाँ मोडल समृद्ध नेपाल सुखी नेपालीको महान राष्ट्रिय आकांक्षासहित मुलुक तीव्र विकासको दिशामा अगाडि बढ्छ । केपी ओलीको विकल्प छैन् ।’

नेता साहले मुलुकमा समाजवादी शासन स्थापना गर्न समेत केपी ओलीको विकल्प नरहेको समेत बताए । ओली प्रधानमन्त्री हुँदा मुलुकलाई समृद्ध बनाउने दह्रो आधारशीला बसालिसकेकोले अब ओलीकै पालामा युगान्तकारी परिवर्तन हुने नेता साहको भनाई छ ।