आठ लाख नाघ्यो एमालेको संगठित सदस्य
नेकपा एमालेको संगठित सदस्यको संख्या आठ लाख नाघेको छ । महाधिवेशन प्रतिनिधि छान्ने अघिल्लो दिनसम्म आज बिहानसम्म एमालेको संगठित सदस्यको संख्या ८ लाख नाघेको हो । एमाले संगठन बिभागका सचिव ज्ञानबहादुर भुजेलले जनताटाइम्स डटकमलाई दिनुभएको जानकारीअनुसार अहिलेसम्म ७७ मध्ये ९ जिल्लाको अन्तिम परिणाम बिभागमा आउन बाँकी छ ।
सचिव भुजेलका अनुसार ६८ जिल्लाको सगठित सदस्यको बिवरण आइसकेको छ । ‘९ जिल्लाको अन्तिम बिवरण आउन बाँकी छ, अन्य जिल्लाको संगठित सदस्यको बिवरण आइसकेको छ, बिभाग सचिव भुजेलले भन्नुभयो, ‘७ लाख ५० हजारको अनुमान गरिएको थियो, उल्लेख्य संख्यामा सदस्यता नविकरण भएको देखियो, ९ जिल्लाको अन्तिम बिवरण आउँदा ८ लाख ५ हजार नाघ्ने देखिएको छ ।’
भुजेलका अनुसार सवै जिल्लाको तथ्यांक हेर्दा संगठित सदस्यमा मोरङ सवैभन्दा बढी संगठित सदस्य भएको जिल्ला बनेको छ । मोरङपछि झापा रहेको छ । मोरङमा ३३ हजार ९ सय र झापामा २७ हजार ४ सय बढी संगठित सदस्यता रहेको भुजेलले जानकारी दिनुभयो । झापा एमाले अध्यक्ष केपी शर्मा ओलीको गृहजिल्ला हो भने मोरङ भानुभक्त ढकाल, लालबाबु पण्डित, बिनोद ढकाल, घनश्याम खतिवडा जस्ता चर्चित नेताको जिल्ला हो ।
संगठन बिभाग सचिव भुजेलका अनुसार प्रदेश कमिटीले अन्तिम रुप दिए पनि संगठन बिभागमा अहिलेसम्म प्रदेश २ का चार जिल्ला सिरहा, सर्लाही, धनुषा, र महोत्तरी, बागमति प्रदेशको काठमाडौं र सुदुरपश्चिम प्रदेशको चार जिल्ला बझाङ, बैतडी, दार्चुला र अछामको अन्तिम सूची आउन बाँकी छ ।
