माओवादीसँग पार्टी एकीकरण हुदैन : उपेन्द्र यादव
जनता समाजवादी पार्टी, नेपाल (जसपा)का अध्यक्ष उपेन्द्र यादवले माओवादी केन्द्रसँग वा अन्य कम्युनिस्ट पार्टीसँग तत्काल पार्टी एकीकरणको सम्भावना नरहेको बताएका छन् । मंगलबार बिहान काठमाडौंबाट प्रशारण हुने एउटा एफएमसँगको अन्तर्वार्तामा यादवले माओवादीसँग पार्टी एकीकरणको सम्भावना नरहेको बताए । माओवादीभित्र विचारको रुपान्तरण भयो भने मात्रै पार्टी एकीकरण सम्भाव रहेको बताए ।
चीनले समेत छाडिसकेको माओ विचारलाई प्रचण्डले बोकेर हिँडेको भन्दै अध्यक्ष यादवले समाजवाद भन्दैमा वा लेख्दैमा जसपाले कम्युनिस्टसँग एकीकरण नगर्ने बताए । माओवादी केन्द्रका अध्यक्ष प्रचण्डले पार्टी एकीकरणको कुराहरू गरिरहेका बेला उपेन्द्र यादवले सो प्रस्ताव अस्वीकार गरिदिएका छन् ।
जसपाका अध्यक्ष यादवले सत्तारुढ गठबन्धनबीचको सम्बन्धमा प्रश्न नउठाउन आग्रह गरेका छन् । उनले विशेष परिस्थितिमा संविधान र लोकतन्त्रको रक्षाका लागि गठबन्धन बनेको भन्दै मिलेर निर्वाचनमा प्रतिस्पर्धा गर्ने बताएका छन् । अब हुने राष्ट्रिय सभाको निर्वाचनमा सत्तारुढ गठबन्धनले मिलेर उम्मेदवार उठाउने बताएका छन् ।
