चितवनबाट कांग्रेसले मलाई लखेटन खोज्यो : प्रचण्ड
नेकपा माओवादी केन्द्रका पुष्पकमल दाहाल ‘प्रचण्ड’ले आफूले कांग्रेस सभापतिलाई प्रधानमन्त्री बनाएको बदला कांग्रेस कार्यकर्ताले चितवनबाट लखेटन खोजेको गुनासो गर्नुभएको छ । चितवनमा आज आयोजित कार्यक्रममा प्रचण्डले यस्तो गुनासो गर्नुभएको हो ।
प्रचण्डले चुनावी परिणामले कांग्रेस र माओवादी हाराहारी भए पनि शेरबहादुर देउवालाई प्रधानमन्त्री बनाइएको र त्यसमा कांग्रेसका कार्यकर्ता खुसी होलान् भन्ने आफूले ठानेको भए पनि त्यसविपरीत पाएको बताउनु भयो । चितवनबाट आफू र रेणुलाई लखेट्ने भाषण कांग्रेस चितवनका सभापतिले गर्नु विडम्बना भएको प्रचण्डले बताउनु भयो ।
‘जित्न त चुनावमा कांग्रेसले भन्दा हामीले धेरै जितेका थियौं तर पनि शेरबहादुरजीलाई प्रधानमन्त्री बनायौं, मैले सोचेको थिएँ कम्तीमा चितवन जिल्लाका कांग्रेस नेता कार्यकर्ताहरू खुसी भएका होलान । उनीहरूले धन्यवाद भन्लान भन्ने ठानेको त माओवादी, प्रचण्ड र रेणुलाई लखेट्ने भनेर यहाँका सभापति भन्नेहरूले बोले । तपाईंहरूले सुन्नुभयो । यो त बडो विडम्बनाको कुरा भयो,’ प्रचण्डको भनाई थियो ।
