प्रचण्डलाई अर्को झड्का, माओवादी त्यागेर सिंगो बस्तीका सबै एमालेमा प्रवेश
नेकपा (एमाले) ले भोली अर्थात (कात्तिक ६ गते) सिन्धुपाल्चोकका १०३ वडामा एकैसाथ अधिवेशनको तयारी गरेको छ । अधिवेशनको पूर्वसन्ध्यामा एमालेले विभिन्न वडाका बस्ती–बस्तीमा पुगेर भेटघाट तथा छलफल गरेको छ ।
जसक्रममा बलेफी गाउँपालिका– ७ चिम्लीङमा भएको भेलामा सिंगो बस्तीका सबै नै एमालेमा प्रवेश गरेका छन् ।यसअघि माओवादी केन्द्रमा रहेका दलित बस्तीका सबै स्थानीय एमालेमा प्रवेश गरेका हुन् । शुक्रबार बिहान दलित बस्तीमा भएको भेटघाट र छलफलपछि सबै नै एमालेको विचार र सिद्धान्तप्रति प्रतिबद्ध हुँदै एमालेमा प्रवेश गरेको नेकपा एमाले वागमती प्रदेश कमिटीका सदस्य एवम बलेफी गाउँपालिका अध्यक्षसमेत रहेका केदार क्षेत्रीले जानकारी दिनुभयो । दलित बस्तीमा रहेका करिब ५० जना एमालेमा प्रवेश गरेका छन्।
माओवादी केन्द्रमा रहेका उनीहरु सबै एमालेमा प्रवेश गरेपछि बलेफी–७ मा आफूहरुको संगठन अब पहिलाको भन्दा झन् बलियो भएको क्षेत्रीले बताउनुभयो । नवप्रवेशीहरुलाई क्षत्रीले खादा, अबिर लगाएर एमालेमा प्रवेश गराउनुभएको हो । एमाले भित्रको अन्तरविरोध साम्य भएपछि बलेफीका विभिन्न वडाहरुबाट कांग्रेस, माओवादीलगायतका दलबाट एमालेमा हालसम्म करिब ३ सय प्रवेश गरेको क्षत्रीले दाबी गर्नुभयो । उहाँले जनता टाइम्सलाई दिएको जानकारी अनुसार वडा अधिवेशनमा पनि सबै वडाहरुबाट विभिन्न पार्टी परित्याग गरेर एमालेमा प्रवेश गर्नेहरुको सूची लामो रहेको छ ।
पार्टीमा समस्या हुँदा केही समय आफूहरु पार्टीको काममा सक्रिय हुन नपाएको र अहिले नेकपा एमाले एकताबद्ध भएपछि एकताको सन्देश लिएर गाउँगाउँमा पुग्दा स्थानीय उत्साही भएको क्षेत्रीले बताउनुभयो । उहाँले एमालले देशमा रहेको सवैको भावनालाई प्रतिनिधित्व गर्ने पार्टी भएको हुदा विभिन्न पार्टी परित्याग गरि एमालेमा गोलबद्ध हुनेहरुको संख्या दिन प्रतिदिन बढ्दै गएको बताउनुभयो ।
