चितवन समाजवादीका जिल्ला अध्यक्ष एमालेमै फर्किए
माधव नेपाल नेतृत्वको नेकपा एस चितवनको प्रस्तावित जिल्ला कमिटी अध्यक्ष तेजबहादुर खड्का एमालेमा नै फर्किएर पार्टी काममा लागेका छन् । १० बुँदे सहमती कार्यान्वयन हुनुपर्ने माग गरेका खड्का समाजवादीको वडा कमिटी गठनमा समेत सहभागी भएका थिए । माधव नेपालले देउवाले ल्याएको अध्यादेशमार्फत नेकपा एमाले फुटाएपछि समाजवादीमा नगएको स्पष्टिकरणसमेत दिए ।
बीचमा लामो समय दुबैतिर सक्रिय नभएका खड्का एमालेमा नै फर्किएका छन् । उनले समाजवादीको जिल्ला अध्यक्ष बन्न अस्वीकार गरेपछि डा. कृष्ण पन्तलाई जिल्ला अध्यक्ष बनाइएको थियो।
समाजवादीतिर पनि नगएका र एमालेमा पनि सक्रिय नभएका खड्काले एमालेको चितवनको तेस्रो पूर्ण बैठकमा उपस्थित भएर टुटफुट र विभाजन नभई एकतामा समाहित हुन सबैलाई आग्रह गरे ।
एमालेको तत्कालिन जिल्ला उपाध्यक्ष रहेका खड्कालाई प्रदेश कमिटीको सदस्य बनाइएको छ । खड्काको नेतृत्वमा पार्टी एकता संयोजन कार्यदल बनेको छ । उनले आफू निरन्तर पार्टीको काममा लाग्ने बताए । उनलाई एमालेको बागमती प्रदेश कमिटी सदस्य बनाइएको छ ।
