यो माओवादी पार्टी कति वर्षमा सकिएला : रामेश्वर खनाल

 

 

पूर्वअर्थसचिव रामेश्वर खनालले देशमा माओवादी सखाप नपारे नेपालीको जीवन सुखी नहुने जिकिर गर्नुभएको छ । सामाजिक सञ्जाल ट्वीटरमा बहसको सुरूवात गर्दै तात्कालीन नेकपा माओवादीका नेता डा बाबुराम भट्टराई प्रधानमन्त्री हुँदा आर्थिक सल्लाहकार रहनुभएका खनालले माओवादीको नाटक लामो भएकाले अब सकिनुपर्ने बताउनु भएको हो ।

‘यो माओवादी पार्टी कति वर्षमा सकिएला ? कसैको अनुमान ? नाटक अली लामै भयो त,’ खनालले भन्नुभएको छ । उहाँले माओवदी कहिले सकिएला भन्ने विषयमा कसैको अनुमान भए त्यो पनि भन्न सुझाउनु भएको छ ।

खनालले आफ्नै प्रश्नको जवाफमा भैरहेको बहसमा सहभागी हुँदै फेरि अब माओवादी समाप्त नपार्ने हो भने उसले विकासका सारा काम रोक्ने बताउनु भएको छ । ‘राजा फर्कन त गाह्रो छ। चाहना राख्नु अलग कुरा हो। प्रति व्यक्ति आम्दानी एक वित्ता मात्र बढे पनि माओवादी सखाप हुन्थे। माओवादी सखाप नपारे नेपालीको जीवन सुखी हुने देख्दिन म त। डर के हो भने आफू सकिने अनुमानले विकासका सारा काम रोक्ने माओवादी षडयन्त्र हुन सक्छ १,’ खनालको भनाई छ ।