एनआरएनको चुनाव जिताउन कांग्रेसको ९ भाई सडकमा
नेपाली कांग्रेसले गैर आवासीय नेपाली संघ (एनआरएनए) मा कुल आचार्यलाई उम्मेद्वार बनाउँदै चुनाव जिताउन ९ जना नेतालाई जिम्मेवारी तोकेको छ । कांग्रेसले एनआरएनएमा पार्टीको झण्डा फहराउने कामका लागि कांग्रेसले महामन्त्री पूर्णबहादुर खड्काको नेतृत्वमा ९ जना नेताले विभिन्न क्षेत्र हेर्नेगरी ह्वीप कार्यान्वयनको जिम्मेवारी दिएको हो ।
नेपाली कांग्रेसको केन्द्रीय कार्यालयका मुख्यसचिव कृष्णप्रसाद पौडेलका अनुसार पूर्णबहादुर खड्काको संयोजकत्वमा एनआरएनएमा नेपाली कांग्रेसका उम्मेदवारहरूलाई जिताउन पार्टीले छुट्टै कमिटी समेत गठन गरेको छ । सोही कमिटीको असोज ७ गतेको निर्णय अनुसार एनआरएनएको चुनावमा नेपाली कांग्रेसका उम्मेदवार कुल आचार्यको नेतृवको प्यानललाई चुनाव जिताउन ८ जनाले भूगोल हेर्नेगरी नै जिम्मेवारी पाएका छन ।
कांग्रेसले आफ्नो आधिकारिक उम्मेदवार कुल आचार्य रहेको पनि उक्त पत्रमा उल्लेख गरेको छ । नेपाली जनसम्पर्क समितिहरूका लागि लेखिएको चलानी नम्बर ९९ को पत्रमा ८ जना नेताले कसले कुन भूगोलमा ह्वीप कार्यान्वयन गराउने भनेर उल्लेख गरिएको छ ।
जस अनुसार युरोप क्षेत्रमा सहमहामन्त्री डा प्रकाशशरण महत र केन्द्रीय सदस्य गगनकुमार थापाले जिम्मेवारी पाएका छन । त्यस्तै केन्द्रीय सदस्यद्धय अर्जुननरसिंह केसी र अर्जुनप्रसाद जोशीले एसिया क्षेत्रको जिम्मेवारी तोकिएको छ । त्यस्तै अमेरिका क्षेत्रको जिम्मेवारी केन्द्रीय सदस्य डा मिनेन्द्र रिजाल, अफ्रिका, मध्यपूर्व क्षेत्र र नेपाली जनसम्पर्क समितिहरूसँग समन्वय गर्ने जिम्मेवारी केन्द्रीय सदस्य गोविन्द्र भट्टराई र प्रवक्ता विश्वप्रकाश शर्माले पाउनुभएको छ भने ओसियाना क्षेत्रको जिम्मेवारी केन्द्रीय सदस्य सुरेन्द्र पाण्डेले पाएका छन । इन्टरनेट तथा केवल सेवा अवरुद्ध बनेको छ ।
