बालुवाटारमा मन्त्री छान्ने बैठक, माधव नेपालको भागमा ५ जना ( नामसहित )
मन्त्रिपरिषद विस्तारबारे छलफल गर्न सत्ता गठवन्धनका शीर्ष नेता छलफलमा जुटेका छन् । सरकार गठनको डेढ महिना बितिसक्दा पनि मन्त्रिपरिषदले पूर्णता: नपाएको भन्दै प्रधानमन्त्री शेरबहादुर देउवाको आलोचना भैरहेका बेला सत्ता साझेदार काँग्रेस,माओवादी केन्द्र र एकीकृत समाजवादीका शीर्ष नेता छलफलमा जुटेका हुन्।
प्रधानमन्त्री निवास बालुवाटारमा जारी छलफलमा प्रधानमन्त्री एवं कांग्रेस सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधव नेपाल सहभागी हुनुहुन्छ । नेताहरुबीच मन्त्रिपरिषद विस्तार र समसामायिक राजनीतिका बारेमा छलफल भैरहेको बताइएको छ । स्रोतका अनुसार आज या भोलिमै मन्त्रिपरिषदलाई पूर्णता: दिने तयारी छ।
नेपाली काँग्रेस,नेकपा माओवादी केन्द्र, एकीकृत समाजवादी र जनता समाजवादी पार्टी (जसपा) बीच ५ वटा मन्त्रालयको दरले भाग लगाउने सैध्दान्तिक सहमति भएको हो । कानुन मन्त्रालयको हकमा सबै दलको सहमति हुने गरी एक जना नेकपा एकीकृत समाजवादीनिकट प्रतिष्ठित कानुन व्यवसायीलाई मन्त्री बनाउने सम्बन्धमा पनि गठबन्धनका शीर्ष नेताहरुले सहमति गर्नुभएको बुझिएको छ ।
यसअघि प्रधानमन्त्रीसहित गृह,स्वास्थ्य र कानुन मन्त्रालय काँग्रेसको भागमा परिसकेको थियो । कानूनबाट अब ज्ञानेन्द्रबहादुर कार्की अर्कै मन्त्रालयमा जाने कुरा छ । अर्थ र ऊर्जा मन्त्रालय माओवादी केन्द्रको भागमा परेको छ । अब एकीकृत समाजवादी र जसपाको भागमा बाँकी रहेकामध्ये महत्वपूर्ण मन्त्रालयसहित पाँच वटा पर्ने भएको हो । मुख्यगरी परराष्ट्र,शहरी विकास,स्थानीय र सामान्य प्रशासन,कृषि,वन,उध्योग,वाणिज्य तथा आपूर्ति,महिला,बालबालिका,श्रम,भौतिक योजना,पर्यटन,रक्षा,भूमिसुधार,सञ्चार मन्त्रालय अझै बाँकी छन् ।
एकीकृत समाजवादीबाट स्थायी समिति सदस्य बेदुराम भुसाल, जीवनराम श्रेष्ठ, रामकुमारी झाँक्री, प्रेम आले, मेटमणी चौधरी सरकारमा जाने सम्भावना रहेको बताइन्छ ।
