माधव पक्ष सरकारमा नजाने, देउवा अल्पमतमा पर्ने संकेत, १० बुँदे मान्न तयार
नेकपा एमालेको माधव नेपाल पक्षले पार्टीमा गठित एकता कार्यदलले गरेको १० बुँदे सहमतिलाई नै एकताको आधार ठहर्याएको छ । दुई दिनसम्म चलेको केन्द्रीय समिति वैठक आज ४ बुँदे निर्णय गर्दै सम्पन्न भयो । बैठकपछि पत्रकारसँग बोल्दै स्थायी कमिटी सदस्य नेता रघुजी पन्तले आफ्नो समूह सरकारमा नजाने बताए । उनले भने देउवा सरकार अल्पमतमा पर्ने संकेत देखिएको छ ।
बैठकले आजसम्म भएका सबैखाले सहमतिलाई आधार मानेर एकताप्रक्रिया अझ परिष्कृत बनाउने र संवादलाई निरन्तरता दिने निर्णय गरेको उनले जानकारी दिए । बैठकले एकता प्रक्रियामा अवरोध हुने गरी पार्टी सदस्यता वितरण र नवीकरण लगायतका सांगठनिक गतिविधि नगर्न समेत संस्थापन पक्षसंग आग्रह गरेको छ ।
१० बुँदे लगायतका सहमतिले एकताको आधार तयार गरेको छ । पार्टीलाई एकताबद्ध बनाउन थप सजगतासाथ अगाडि बढ्नुपर्छ भन्ने बैठकको निर्णय हो’, पन्तले भने । बैठकलाई सम्बोधन गर्दै वरिष्ठ नेता माधवकुमार नेपालले अध्यक्ष केपी शर्मा ओलीले आफूलाई जति गाली गरे पनि एमाले एकताको पक्षमा आफू रहेको बताए । ‘केपी ओलीले जति गाली गरेपनि म अझै पनि एमाले एकताको पक्षमा छु । केपी ओलीले हामीलाई अल्मल्याउन खोजेको हो कि भन्ने शंका छ तर पनि त्यस्तो नहोला भन्ने मेरो विश्वास छ । एकताको प्रयत्न जारी राखौ’, नेपाललाई उद्धृत गर्दै पन्तले भने ।
बैठकले प्रतिनिधिसभा पुनःस्थापना गर्ने सर्वोच्च अदालतको फैसलाको स्वागत गरेको छ । त्यस्तै पार्टीका विभिन्न नेतालाई लाञ्छना लगाउने र आरोपित गर्ने काम दुवै पक्षबाट हुन नहुनेमा ध्यानाकर्षण समेत बैठकले गरेको छ । केन्द्रीय कमिटीको बैठकमा आज ३५ जना केन्द्रीय सदस्यले धारणा राखेका थिए । उनीहरूले सम्मानजनक पार्टी एकताको पक्षमा धारणा राखेका थिए ।
