एमालेमा दुई वटा अध्यक्ष बनाउने तयारी
.
एमालेका नेता युवराज ज्ञवालीले पार्टीमा दुई वटा अध्यक्ष राख्ने प्रस्ताव उपयुक्त रहेको भन्दै स्वागत गरेका छन् । मंगलबार बिहान एक रेडियो अन्तर्वार्ताका क्रममा ज्ञवालीले एमालेमा दुई वटा अध्यक्ष बनाएर जाँदा विवाद समाधान हुने बताए । उनले अध्यक्ष केपी ओलीद्वारा राखिएको दुई वटा अध्यक्षको प्रस्ताव उपयुक्त रहेको बताए ।
‘हामीले दुई वटा अध्यक्ष मागेका छैनौँ’, नेता ज्ञवालीले भने, ‘अध्यक्ष केपी ओलीले नै सार्वजनिक कार्यक्रममा दुई वटा अध्यक्षको प्रस्ताव गर्नुभएको हो । त्यो प्रस्ताव नराम्रो छैन । पार्टी एकताका लागि ठीक छ ।’
शेरबहादुर देउवा नेतृत्वको सरकारमा वरिष्ठ नेता माधव नेपाल समूह सहभागी नहुने बताए । ‘हाम्रो उदेश्य भनेको संविधान र लोकतन्त्र रक्षा गर्नुथियो । संसद बचाउनु थियो । त्यो उदेश्य पूरा भएको छ’, उनले भने, ‘अब पार्टी एकतामा लाग्छौँ ।’ नेता ज्ञवालीले पार्टी एकतामा अवसर पर्ने गतिविधि कुनै पनि पक्षबाट हुन नहुने बताएका छन् । ज्ञवाली वरिष्ठ नेता नेपाल समूह निकट मानिन्छन् ।
