प्रचण्डको कारवाही अवैध हो, म एमाले र माओवादीको मतबाट जितेको हुँ : प्रभु साह
सांसद पदमा पुर्नवहाली माग गर्दै सर्वोच्च अदालतमा रिट दायर गरेका तत्कालीन माओवादीका चार नेतामध्ये प्रभु साहले अरुको भन्दा थप जिकिर गरेका छन् । उनले आफू एमाले र माओवादी केन्द्रको साझा घोषणापत्र र साझा उम्मेदवार भएर प्रतिनिधिसभा सदस्य निर्वाचित भएकोले कुनै पार्टीको नेताले आफ्नो पार्टी त्याग गरेको आरोप लगाएकै भरमा पद रिक्त नहुने जिकिर गरेका छन् ।
सर्वोच्च अदालतमा दयार गरिएको रिटमा साहले आफूलाई एमाले र माओवादी केन्द्र दुवैको समर्थन,विश्वास र उम्मेदवारी प्राप्त भएकाले माओवादी अध्यक्ष प्रचण्डले एकतर्फी रुपमा गरेको कारवाही स्वीकार्य नहुने जिकिर गरेका छन् । उनले चुनावकै बेला निकट भविष्यमा पार्टी एकीकरण गर्ने भनेर साझा उम्मेदवार बनेको र साझा घोषणा पत्र लिई जनतामा गएको कारण दुवै दलहरु एक ठाउमा रहुन् भन्ने मनसाय राखी गरिएको कार्य दल त्यागको परिभाषाभित्र नपर्ने बताएका छन् ।
साहले आफूले दल त्याग नगरेको भन्दै माओवादी केन्द्रको २०७७ चैत १ र २ गते बसेको केन्द्रीय समिति बैठकले पुष्पकमल दाहाललाई अधिकार प्रत्योजन गरिएको आधारमा स्पष्टीकरण सोधेर कारवाही गरेको भन्ने व्यहोरा नै झुटो रहेको जिकिर गरेका छन् । केन्द्रीय समिति सकिनु एक दिनअघि नै आफूलाई स्पष्टीकरण पत्र बुझाएको र कुनै कानूनी प्रक्रिया पूरा नगरी सांसद पद रिक्त गर्ने दुषित मनोभावनाको साथ कार्य गरिएकोले सबै निर्णय बदर गर्न उनले माग गरेका छन् । फागुन २३ को फैसलापछि नेकपाको अर्को नाम लिएर निर्वाचन आयोग जान छाडेर अदालतले दिएको १५ दिनको समय नपुग्दै आफूहरुमाथि भएको कारवाही अवैध हुने जिकिर साहको छ ।
