उपप्रधानमन्त्री सहित गृहमन्त्री बन्दै बामदेव गौतम
नेकपा एमालेभित्र कित्ताकाट लगभग स्पष्ट भएको छ । तटस्थ बस्दै आएका उपाध्यक्ष बामदेव गौतम वरिष्ठ नेता माधवकुमार नेपाल पक्षमा गएका छन् । उनी उपप्रधानमन्त्रीसहित गृह या विकासे मन्त्रालयको जिम्मेवारीमा जाने निश्चितप्रायः भएको छ ।
माधव नेपाललाई भीम रावललगायतका नेताहरुले छाड्ने अवस्था बनेपछि बामदेवको इन्ट्री भएको थियो । उनले माधव नेपाल र पुष्पकमल दाहाल प्रचण्डलाई साथ राखेर भविष्यसम्मको रणनीति तयार गरेका थिए । त्यसपछि नेपाल पक्षमा लागेर शेरबहादुर देउवालाई विश्वासको मत दिने सांसद संख्या बढाउन लागेका थिए ।
गौतमले साउनको १ र २ गते निकै सक्रिय भूमिका खेलेको बुझिएको छ । उनकै पहलमा केही सांसदहरु अध्यक्ष केपी शर्मा ओली समूह छाडेर नेपाल समूहमा आएका थिए । मतदानको बखत मात्र त्यो खुलेको थियो । गौतमले मतदानभन्दा केही घन्टा अघि आफू विश्वासको मतको पक्षमा रहेको सार्वजनिक रुपमा बोलेका थिए । योसँगै उनी विधिवत रुपमा माधव नेपाल पक्षमा लागेको देखिएको थियो ।
उनले विगतमा काँग्रेस सभापति शेरबहादुर देउवालाई छुट्टै भेटेर प्रधानमन्त्री बन्न सहयोग गर्ने वचन समेत दिएका थिए । उनले प्रतिनिधि सभा ब्युँताउने सवालमा निकै महत्वपूर्ण भूमिका खेलेको बुझिएको छ । देउवालाई विश्वासको मत दिलाउन पनि उनले एमालेभित्र सक्रियता देखाएका थिए ।
गौतमले ओलीमाथि चौतर्फी दबाब बढाउन पनि यस्तो भूमिका खेलेका थिए । उनले कुनै हालतमा ओलीलाई एमाले अध्यक्षबाट हटाउने गरी सक्रियता बढाइसकेका छन् । यसैगरी, माधव नेपाल, झलनाथ खनाल र बामदेव गौतमले ओलीलाई अध्यक्षबाट हटाउने प्रयास गर्ने नभए विकल्पमा पार्टी विभाजन गरी नेकपा माओवादी केन्द्रसँग मिलेर एकीकृत पार्टी बनाएर जानेबारे समेत छलफल बढाएको बुझिएको छ ।
