माधव नेपालले भाँडिदिए कार्यदलको पाँच बुँदे सहमति
एमाले बरिष्ठ नेता माधवकुमार नेपालले आफ्नै समुहका नेताले गरेको सहमतिलाई तोडिदिनु भएको छ । अध्यक्ष केपी शर्मा ओली र बरिष्ठ नेता नेपालबीचको भेटबार्तापछि कार्यदलले तयार पारेको सहमतिको पाँच बुँदे मस्यौदालाई बरिष्ठ नेता नेपालले आफ्नो पदको टुंगो नभई मिल्न नसक्ने भनेर तोदिदिनु भएको हो ।
कार्यदलले एमालेको सम्पुर्ण संरचनालाई २०७५ जेठ २ मा फर्काउने गरी सहमतिको पाँच बुँदा तयार पारेको थियो । सो सहमतिलाई अध्यक्ष ओलीले सहमति जनाउनु भएपनि नेपालले भने सहमतिका कुरा ठीक भएपनि पहिलो मेरो टुंगो हुनुपर्यो भन्दै भाँडनुभएका कार्यदलका एक नेताले जनताटाइम्स डटकमलाई बताए । ती नेताका अनुसार वरिष्ठ नेता नेपालले एमालेमा फर्किएर काम गर्नका लागि महाधिवेशनअगावै आफू पनि अध्यक्ष हुनुपर्ने पहिलो सर्त राख्नुभएको छ । आफूले अध्यक्ष ओलीसँग यस बिषयमा प्रष्ट कुरा गरेको बताउँदै नेता नेपालले आफ्नो तर्फका कार्यदल सदस्यहरुसँग अध्यक्षमा हाताहाती सहमतिपछि मात्रै एमालेमा फर्कने अडान राख्नुभएको हो ।
मेरियट होटलमा बुधवार साँझ पार्टी अध्यक्ष एवं प्रधानमन्त्री ओलीसँग भएको छलफलमा बरिष्ठ नेता नेपालले बिधानमै नभएको पद चाहिन्ने सर्त राख्नुभएको थियो । जवाफमा ओलीले कार्यदलले जे ल्याउँछ मान्छु भन्नुभएको थियो । तर नेता नेपालले एमाले र माओवादीबीच एकता भएको जसरी नै दुई अध्यक्ष र निर्वाचन आयोगलगायत सवैतिर दुई अध्यक्षको हस्ताक्षर हुनुपर्ने भन्दै सर्त राख्नुभएको हो । नेता नेपालले सरकारले गर्ने सबै नियुक्तिमा आफ्नो पनि बराबर भागवण्डा हुनुपर्ने, महाधिवेशन अघि नै दोस्रो अध्यक्ष र महाधिवेशनपछि एकल अध्यक्ष बनाउनुपर्ने र संगठन परिचालनमा बरावरी हिस्सतासहितको अधिकार दिनुपर्ने शर्त राख्नुभएको कार्यदलका ती सदस्यले जनताटाइम्सलाई बताए ।
नेपालको सोही अडानका कारण एकताको संभावना सकिएको निश्कर्षसहित घनश्याम भुसालले बिहीवार कुनै प्रगति नभएको जानकारी दिनुभएको ती नेताले बताए । ‘कार्यदलमा सवै कुरा मिल्यो, पाँच बुँदे सहमति पनि भयो, तर माधव कमरेडको अध्यक्ष नभइ नहुने चाहना र माओवादी र एमालेबीच एकता हुँदा भएजसरी नै दुई पक्षबीच एकता हुनुपर्ने अडानले सवै कुरा भाँडियो,’ कार्यदलका अर्का नेताले जनताटाइम्स डटकमसँग भन्नुभयो । बरिष्ठ नेता नेपाल मिल्न नचाहेको र बिपक्षी गठबन्धनतिरै रमाउन चाहेको तथ्य आफूसँगको बार्तामा खोलेको अध्यक्ष ओलीले बिहीवार जनसंगठनका केही पदाधिकारीहरुसँग खोल्नुभएको थियो ।
आफ्नै समुहका प्रभावशाली नेताले तयार पारेको र सहमति गरेको बिषयमा समेत नेता नेपालले आफ्नो पदीय आकांक्षालाई राखेर बाधक बनाउनु भएको हो । ती नेताका अनुसार नेता नेपालले आफू प्रचण्डसँग मिल्दा अध्यक्ष भइसकेको कारण पनि ओलीसँग मिल्दा अध्यक्ष नै चाहिने सर्त राख्नुभएको छ । नेपालको अडानका वावजुद कार्यदलले एकताको प्रयाशलाई जारी राखेर बैठक अघि बढाएको छ ।
