भीम रावल पनि ओली क्याम्पमा, एमालेमा नयाँ तरंग
नेकपा एमालेका उपाध्यक्ष भीम रावलले अध्यक्ष समेत रहेका प्रधानमन्त्री केपी शर्मा ओलीविरुद्ध सबैभन्दा आक्रामक बन्दै आएका थिए । तर, पछिल्लो केही दिनमा उनी नरम बन्दै गएका छन् । यसै हप्ता बालुवाटारमा ओलीले बोलाएपछि पुगेका रावलले गम्भीर कुराकानी गरेका थिए । उनले एमाले एकताको सूत्रबारे छलफल गरेको बुझिएको छ । ओलीले रावललाई मिलेर जाऔं भनेपछि माहोल सकारात्मक बन्दै गएको छ । एमालेको एकता कायम राख्नका लागि गठित कार्यदल पनि निकै सक्रिय भएको छ । कार्यदल ब्युँतिएपछि रावल पनि सक्रिय छन् ।
ओलीले पछिल्लो समय रावलको शक्ति देखे भोगेका छन् । माधव नेपाल पक्षधरमा रावल निकै शक्तिशाली देखिएका छन् । सुदूरपश्चिममा उनको बलियो पकड छ । कर्णालीमा पनि उनले शक्ति देखाइसकेका छन् । सुदूरपश्चिमा ओली पक्ष अल्पमतमा छ । त्यहाँ भीम रावलको पकड देखिएको छ । संसदीय दलमा पनि उनकै बहुमत छ ।
सात प्रदेशमध्ये प्रदेश संसदीय दलमा सुदूरपश्चिममा मात्र माधव नेपाल पक्ष बहुमतमा छ । यसको कारण रावल नै हुन् । त्यसैले ओलीले रावलसँगै सिधा कुरा गरेर पार्टी एकताको सुत्रबारे छलफल गरेका थिए । यसले माहोल पनि सकारात्मक बन्दै गएको छ ।
