देउवाले जस्तो लोकतन्त्र दरवारमा बुझाउदिन्न : प्रधानमन्त्री ओली
प्रधानमन्त्री केपी शर्मा ओलीले कांग्रेसका सभापति शेरबहादुर देउवालाई प्रजातन्त्रलाई दरवारमा बुझाएको घटना स्मरण गराउनु भएको छ । मदन जयन्तीको अवसरमा आज आयोजित कार्यक्रममा एमाले अध्यक्षसमेत रहनुभएका प्रधानमन्त्री ओलीले माघ १९ को घटना स्मरण गर्दै ‘कू’ को बिषय संझाउनु भएको हो । प्रधानमन्त्री बन्ने उत्कट इच्छाका कारण देउवाले लोकतान्त्रिक मार्ग छोडेको ठोकुवा पनि प्रधानमन्त्री ओलीले गर्नुभयो । लोकतान्त्रिक आन्दोलनमा योगदानको इतिहास भएको कांग्रेस पार्टी अहिले ‘प्रचण्डपन्थी’ बनेको र लोकतन्त्रकै बिरुद्धमा लागेको प्रधानमन्त्रीको भनाई थियो ।
‘शेरबहादुरजीले प्रधानमन्त्री हुने उत्कट इच्छाले लोकतान्त्रिक मार्ग छोड्नुभो । केही जाली–फटाहा टिपेर कृत्रिम र अलोकतान्त्रिक मार्गबाट प्रधानमन्त्री बन्न खोज्नुभो । संसदबाट बनेको भए हुन्थ्यो । जनतामा गएर बनेको भए हुन्थ्यो । जनतामा जाने बाटोलाई अवरोध गरेर अन्तैबाट प्रधानमन्त्री बन्न खोज्ने ?’ प्रधानमन्त्री ओलीले भन्नुभयो, ‘जनतामा जाने कुरालाई ‘कु’ भन्यो कांग्रेसले । जनतामा जाने प्रस्ताव ‘कु’ हो भने १७ सालको लोकतान्त्रिक अभ्यास के थियो ? कांग्रसले कु भनेको के हो बिर्सिसकेछ । शेरबहादुरलाई सोध्न चाहन्छु ? माघ १९ के थियो । उहाँलाई लोकतान्त्रिक विधिबाट सत्ता हस्तान्तरण गरिएको थियो ? असोज १८ के थियो ? कु थियो कि थिएन ? त्यतिबेला कु भन्ने शब्द उहाँको मुखबाट आउने हिम्मत किन भएन ?’
सम्बोधनको क्रममा प्रधानमन्त्री ओलीले पूर्वराजा ज्ञानेन्द्र र देउवा दुवैलाई कडा प्रहार गर्नुभयो । ‘निर्वाचित प्रधानमन्त्रीलाई अपदस्थ गरेर ‘अदक्ष’ कि के अरे ? ‘अ दक्ष’ भएको हुनाले हटाइयो । ‘अक्षम’ हुनाले हटाइदिएँ । जननिर्वाचित प्रधानमन्त्री सक्षम छ कि छैन भनेर निर्णय गर्ने आर्टिफिसियल्ली बनेको तथाकथित गद्दीमा बस्ने व्यक्तिको काम होइन । त्यो जनताको काम हो । त्यतिबेला देउवाले किन ‘कु’ भन्न सक्नुभएन ? अहिले जनताका बीचमा जाने कुरा गर्दा कु भन्या छ । प्रतिगमन भन्या छ । प्रचण्डको भाषासमेत सापटी लिएर । भाषा सापटी मात्रै होइन आफ्नै बनाइसक्नुभो । दया लाग्छ । लोकतान्त्रिक आन्दोलनमा इतिहास भएको पार्टी यस ढंगले प्रचण्डपन्थी भएको देख्दा अचम्म लाग्छ,’ प्रधानमन्त्री ओलीले भन्नुभयो ।
