माधव-खनाल गुट छिन्नभिन्न, गम्भीर संकटमा पुग्यो
प्रधानमन्त्री तथा एमाले अध्यक्ष केपी शर्मा ओलीले पार्टीलाई एकताबध्द बनाउन आइतबार साँझ जारी गरेको ६ वटा बुँदा र दुई पृष्ठको सार्वजनिक आह्वानका अधिकांश बुँदा अमूर्त र द्वैअर्थी देखिएको अर्को पक्षको गुनासो छ । समग्रमा उक्त आह्वान पत्र कसैको आग्रहमा हानिएको झटारो मात्रै भएको बताइन्छ ।
अध्यक्ष ओलीको आह्वानबाट एमाले वरिष्ठ नेताहरू झलनाथ खनाल तथा माधवकुमार नेपाल समूहमा रही बालुवाटारसङ्ग घनिभूत वार्तामा जुटेका दुई जना युवा नेता तुलनात्मक रुपमा उत्साहित हुनुभएको थियो । उहाँहरूले लगत्तै सामाजिक सञ्जालमा प्रतिक्रियासमेत पोष्ट गर्नुभयो । सोमबार सो समूहले आयोजना गरेको स्थायी समितिको भर्चुअल बैठकमा यसको गतिलो समीक्षा भएको श्रोतले बतायो ।
बैठकमा नेताहरू कसरी प्रस्तुत हुनुभएको थियो भनेर सोधिएको जिज्ञासामा एक जना नेताले भन्नुभयो ‘सुरेन्द्र र योगेश कमरेडले शुरुमा अध्यक्षको आह्वानलाई सकारात्मक रुपमा लिनुपर्छ भन्नुभएको थियो तर अरुले चाँहि ठ्याक्कै त्यहि शब्द उच्चारण गर्नुभएन । तर पनि उहाँहरुले आफ्नो समूहले सार्वजनिक गर्ने धारणामा भाषा नरम र एकतामा जोड दिइनुपर्ने बताउनुभएको थियो ।’
स्रोत भन्छ ‘कसैले पनि अध्यक्ष ओलीका बुँदालाई स्वीकार्न सकिन्छ भनेनन् । योगेश कमरेडले पनि बुँदा स्वीकार्न सकिन्छ भन्नु भएन । उहाँले स्पिरिटलाई सकारात्मक रुपमा लिँदै हाम्रा कुरा यी यी हुन् भनेर जाऔं भन्नुभएको थियो । अधिकांशले ओलीको आह्वानमा लेखिएका बुँदाले वास्तविक एकता गर्न नखोजेको प्रष्ट भएको बताएका थिए ।’
बैठकको निचोड साँच्चि नै एकता गर्न खोजेको हो भने हाम्रा यी बुँदालाई स्वीकार्नुपर्छ भनेर लेख्नुपर्ने र पहिलेका ६ बुँदालाई जोड दिएर विज्ञप्ति जारी गर्नुपर्ने भन्ने नै थियो । बैठकको निश्कर्षबमोजिम नै सोमबार साँझ धारणा पनि सार्वजनिक भैसकेको छ ।
वैचारिक नेताको रुपमा परिचित घनश्याम भुसालले प्रधानमन्त्रीको आह्वानलाई ‘कुनै काम नलाग्ने’ विशेषण दिनुभएको थियो । उहाँले आह्वानको पृष्ठभूमिमा लेखिएका एकाध वाक्यबाहेक अरु कुनै पनि काम नलाग्ने र बकबास भएको बताउनुभयो ।
नेता सुरेन्द्र पाण्डे उक्त बैठकमा अध्यक्ष ओलीको आह्वानप्रति त्यतिसारो आक्रामक रुपमा प्रस्तुत नहुनु भएको बताइन्छ । स्रोत भन्छ,‘सोमबार बिहान सबेरै उहाँले धेरै कमरेडलाई फोन गरेर अघिल्लो दिन ओलीले जारी गरेको आह्वानलाई अस्वीकार नै चाहिँ गरिनहालौँ है भन्नुभएको थियो ।’
उक्त आग्रहलाई मुकुन्द न्यौपानेहरुले अस्वीकार गर्नुभयो । उहाँहरूले ‘ओलीका यस्ता जाली कुरालाई पनि स्वीकार्ने ? हुँदैन, यस्ता छलछामलाई सोझै नकारेर जानुपर्छ,हस्ताक्षर फिर्ता हुँदैन भनेर जानुपर्छ,कारबाही फिर्ता नभई वार्ता हुँदैन भनेर जानुपर्छ’ भन्ने जवाफ दिएको स्रोतको दाबी छ ।
स्रोतले भनेको छ ‘जति हामी अघि बढ्ने हो,त्यति केपी पछि हट्ने हो । यस्ता झिनामसिना कुरामा लत्रेर अघि बढ्ने हो भने केपीले केही पनि गर्दैनन् ।’नेता पाण्डे ‘ठीक छ,भाषाचाँहि नरम बनाऔं,एकता गर्ने ढंगले जानुपर्छ’ भन्दै नरम ढंगले प्रस्तुत हुनुभएको थियो ।
त्यसअघि आइतबार साँझ अर्थमन्त्री विष्णु पौडेलले बालुवाटारले नेपाल समूहका नरम चारै जना युवा नेतालाई फोन गरेर ‘यस्तो आह्वान आउँदैछ है’ भन्नुभएको थियो । त्यसक्रममा नेता पाण्डेले ‘कारबाही फिर्ता लिने कुरो आउँछ कि आउँदैन ?’ भनेर पौडेललाई सोध्नुभएको बताइन्छ ।
बालुवाटार स्रोतका अनुसार आइतबार बिहान उनै नरम भनेर चिनिएका कमरेडहरूको सामूहिक भेटघाट र निर्णयअनुसार आह्वानमा उल्लेख गरिने विषय सुझावको रूपमा पठाइएको बताइन्छ ।
अध्यक्ष ओलीको आह्वानलगत्तै नेता भट्टराईले जनाउनु भएको प्रतिक्रियाको बारेमा पनि बैठकमा कुरो उठेको थियो । बैठकमा व्यक्तिगत प्रतिक्रिया दिन भन्दा सामूहिकतामा जान जोड दिइएको थियो । निचोड ‘हतारिएर स्वागत गर्ने कुरो राम्रो भएन’ भन्ने नै थियो ।
नेता भट्टराईलाई नियमितजसो अध्यक्ष तथा प्रधानमन्त्री, महासचिव ईश्वर पोखरेल र शीतल निवासबाट राष्ट्रपति विद्यादेवी भण्डारीले नियमित सँवाद गरेको सन्दर्भलाई गृह जिल्ला ताप्लेजुङमा भने एमालेवृत्तले त्यत्ति नरुचाएको बताइन्छ ।
अस्तिको एमाले बैठकको कारण हिजो सुदूरपश्चिम प्रदेशसभामा राजनीतिक उथलपुथल भएको छ । प्रधानमन्त्री तथा एमाले अध्यक्ष ओलीले चाहेको ठीक विपरितको राजनीतिक परिदृश्य हिजो धनगढीमा देखिएको थियो । नेपाल समूहको समर्थनमा माओवादी केन्द्रका मुख्यमन्त्री त्रिलोचन भट्टले निरन्तरता पाएका छन् । सँगसँगै संसदीय दलको ह्वीप नमान्ने ओली निकट सात जना सांसदलाई स्पष्टीकरण सोधिएको छ ।
