केन्द्र देखि प्रदेशसम्म एमालेको सरकार ढाल्न माधव नेपाल नै घरदैलोमा
प्रधानमन्त्री केपी शर्मा ओलीविरुद्ध एकजुट भएको विक्षी गठबन्धन केन्द्र देखि प्रदेशसम्म नेकपा एमालेको ओली पक्षरहित सरकार निर्माणमा जुटेको छ । केन्द्रमा ओलीविरुद्ध कानुनी उपचारमा लागेको गठबन्धन प्रदेशहरुमा धमाधम सरकार परिवर्तनमा जुटेको हो । कर्णाली प्रदेशमा एमालेको ओली खेमालाई सत्तामा जान असफल बनाइसकेको विपक्षी गठबन्धन गण्डकी र लुम्बिनी प्रदेशमा सरकार ढाल्न सक्रिय रहँदै आएको छ । प्रदेश १ मा पनि त्यसको तयारी भएको छ ।
प्रदेश २ मा पनि एमालेको ओली खेमालाई जसपाको महन्थ ठाकुर समूहसँग मिलेर सरकार बनाउने प्रयासलाई विफल बनाउन लागिपरेको छ । जसपाको उपेन्द्र यादव समूहले काँग्रेस र माओवादी केन्द्रलाई प्रदेश २ को सरकारमा सहभागी गराएर ओली र ठाकुर समूहको गठबन्धनलाई सरकार बनाउन नदिन लागेको छ । मुख्यमन्त्री लालबाबु राउतले जीतेन्द्र सोनलसहित ठाकुर पक्षीय ३ मन्त्रीलाई हटाइसकेका छन् । अब प्रदेश २ मा काँग्रेस र माओवादी केन्द्रका मन्त्री बन्दैछन् ।
प्रदेश १ मा ओवादी केन्द्रले सरकारलाई समर्थन फिर्ता गरिसकेको छ । अब त्यहाँ पनि अविश्वासको प्रस्तावको तयारी भएको छ । काँग्रेस, माओवादी केन्द्र, जसपा र एमालेको माधवकुमार नेपाल पक्ष एकजुट भएमा मुख्यमन्त्री शेरधन राई नेतृत्वको सरकार ढल्न सक्छ । विपक्षी गठबन्धन त्यसमै लागेको छ । लुम्बिनी र गण्डकीमा विपक्षी गठबन्धनले सरकार ढाल्न खोजेपनि सफल भएका छैनन् । तर, त्यसलाई गति दिन लागेका छन् ।
बागमती प्रदेशमा एमालेको ओली खेमाका डोरमणि पौडेल मुख्यमन्त्री छन् । माधव नेपाल समूहले विद्रोह गरेमा पौडेल नेतृत्वको सरकार ढल्छ । अहिले त्यसको तयारी भइरहेको छ । सुदूरपश्चिम प्रदेशमा मुख्यमन्त्री त्रिलोचन भट्टले विश्वासको मत लिदैछन् । एमालेको माधव नेपाल समूहको संसदीय दलमा बहुमत छ । आज एमालेमा को कता भन्ने विश्वासको मत लिंदा निक्र्यौल हुनेछ । ओली समूह अल्पमतमा रहेकाले त्यहाँ विपक्षी गठबन्धनलाई चुनौती दिन सजिलो छैन ।
केन्द्रमा पनि सर्वोच्च अदालतको आदेशले ओली सरकार टिक्ने या नटिक्ने टुंगो लाग्छ । संवैधानिक इजलाशमा मुद्दा विचाराधीन छ । ओलीको विपक्षमा विपक्षी गठबन्धनका १४६ विघटित प्रतिनिधि सभाका सांसदले रिट दायर गरेकाले अदालतमाथि दबाब छ । त्यसैले ओली कम्तिमा १० सांसदको रिट फिर्ता गराएर देउवासँग बहुमत छैन भन्ने देखाउन खोजिरहेका छन् । उनले एमाले एकताका लागि प्रस्ताव समेत बढाएका छन् ।
