संसद सचिवालयले महतोलाई संसदीय दलको नेताको मान्यता दियो
जनता समाजवादी पार्टी (जसपा) नेपालमा महन्थ ठाकुर किङ मेकर निस्किएका छन् । उनले गरेका कुनै पनि निर्णय रोकिएका छन् । प्रथम अध्यक्षको सुपर पावर देखिँदै गएको छ यसैगरी ठाकुरको संसदीय दलको नेतामा राजेन्द्र महतोलाई चुन्ने निर्णय पनि आधिकारिक प्रमाणित भएको छ । वैशाख ३० बसेको संसदीय दलको बहुमत (महन्थ-राजेन्द्र समूह)को बैठकले महतोलाई दलको नेतामा चयन गरेको थियो ।
मंगलवार संघीय संसद सचिवालयलाई अध्यक्ष महन्थ ठाकुरले पत्र पठाएर जानकारी गराएसँगै महतो आधिकारिक रुपमा दलको नेता चुनिएका हुन् । सचिवालयले अब जसपाको दलको नेताका रुपमा महतोलाई चिन्नेछ । महतोले ३२ सांसदको नेतृत्व गर्नेछन् ।
संसद सचिवालयका महासचिवलाई अध्यक्ष ठाकुरले पठाएको पत्रमा भनिएको छ, ‘वैशाख ३० गते बसेको जनता समाजवादी पार्टी, नेपालको संसदीय दलको बैठकले संघीय संसदीय दलको विधान-२०७७ अनुसार संसदीय दलको नेतामा मा. राजेन्द्र महतोलाई निर्वाचित गरेको व्यहोरा जानकारी गराइन्छ ।’ पत्रसँगै संसदीय दलको विधान, संसदीय दलको बैठकको माइन्युटको प्रतिलिपि पनि सचिवालयलाई उपलब्ध गराइएको थियो ।
