नेकपा एमाले केन्द्रीय महाधिवेशन आयोजक कमिटीको बैठक बालुवारमा
नेकपा एमाले केन्द्रीय महाधिवेशन आयोजक कमिटीको बैठक प्रधानमन्त्री निवास बालुवारमा शुरू भएको छ । बैठकको अध्यक्षता गर्दै पार्टी अध्यक्ष तथा प्रधानमन्त्री केपी शर्मा ओलीले पार्टीभित्र अरुका एजेण्डा बोकेर आउनेहरूलाई कुनै स्थान नरहेको र व्यक्तिगतरूपमा हरेक सदस्यलाई उचित जिम्मेवारी दिइने बताएका छन् । बैठकको शुरूमै अध्यक्षको सम्बोधन चलिरहेको र त्यसपछि महासचिव ईश्वर पोखरेलले सांगठानिक प्रतिवेदन पेस गर्ने केन्द्रीय सदस्य विशाल भट्टराईले जानकारी दिए ।
बैठकमा यसअघि सहभागी नभएका माधव नेपाल पक्षधर केन्द्रीय सदस्य सोम मिश्र र विष्णु रिजाल पनि सहभागी भएका छन् । बैठकलाई सम्बोधन गर्दै अध्यक्ष ओलीले एमाले हौं भनेर एमालेकैविरुद्ध मतदान गर्ने,पार्टीविरुद्ध गतिविधि गर्ने र समानान्तर कमिटीहरु चलाउनेमाथि थप कारवाही हुने चेतावनी समेत दिएका छन् ।
