प्रचण्डको निर्देशनमा माधव–झलनाथको भेला : सूर्य थापा
प्रधानमन्त्री केपी शर्मा ओलीका प्रेस सल्लाहकार एवं नेकपा एमाले नेता सूर्य थापाले असन्तुष्ट माधव–झलनाथ पक्षले गर्न लागेको राष्ट्रिय कार्यकर्ता भेलालाई गाइजात्राको संज्ञा दिनु भएको छ । माधव–झलनाथ पक्षले यही चैत ४ र ५ गते काठमाडौँमा गर्न लागेको भेलाको आलोचना गर्दै थापाले शहरमा विधि र पद्धतिको रमिता कि गाइजात्रा भनेर प्रश्न गर्नु भएको छ ।
मंगलबार सामाजिक सञ्जाल फेसबुकमा उहाँले सानेपास्थित महंगो हेरिटेज गोर्डेनमा आयोजना गर्ने भनिएको कथित गुटगत भेला भन्दै माओवादी केन्द्रका अध्यक्ष पुष्पकमल दाहाल प्रचण्डको निर्देशन र होमवर्क बमोजिमको भेला राम र रमिता हो भन्नु भएको छ । उहाँले यसलाई चैत महिनामा प्रदर्शित गाइजात्रा पनि भन्न सकिने उल्लेख गर्नु भएको छ ।
माधव–झलनाथ पक्षले राष्ट्रिय भेलाको लागि तयार गरेको पोष्टरलाई रातो रेखाले क्रस गरेको तस्वीर राख्दै उहाँले उक्त भेला अस्वीकार्य रहेको पनि जनाउनु भएको छ । १५ बुँदा लामो विचार राख्दै थापाले विभाजन र बिखण्डनकारी तथा एकताविरोधी हर्कतहरुप्रति सचेत र सावधान हुँदै नेकपा एमाले र सूर्य चिह्नको पक्षमा स्पष्ट र एकजुट भएर अघि बढौँ भन्नु भएको छ । अरु कसैको योजनामा परिचालित व्यक्तिका षड्यन्त्रमूलक र जनविरोधी कोसिसहरुलाई परास्त गर्न उहाँले आव्हान गर्नु भएको छ ।
