अध्यक्ष ओलीसंग काँदमा-काँद मिलाएर जाने हो : माधवकुमार नेपाल
नेकपा एमालेका अध्यक्ष केपी शर्मा ओली र वरिष्ठ नेता माधवकुमार नेपाल समूहबीच सोमबार वार्ता भएको छ । पार्टी कार्यालय धुमबाराहीमा उनीहरुबीच नेकपा एमालेलेलाई एकताबद्ध गरेर अघि बढाउने कुरामा सहमति भयो । यद्यपि पछिल्लो समय चर्केको विवादलाई कसरी सम्बोधन गर्ने भन्नेबारे कुनै ठोस सहमति भने भएन ।
नेपाल समूहले फागुन २३ मा सर्वोच्च अदालतले गरेको फैसलापछि पार्टीले गरेका निर्णयहरु खारेज वा फिर्ता हुनुपर्ने अडान राखेको थियो । नेता नेपालका अनुसार उनीहरुको प्रस्तावमा प्रधानमन्त्री समेत रहेका अध्यक्ष ओलीले सहमति नजनाएको बताएका छन् ।
उनले सुरुमा वार्ता सकारात्मक भएको बताए । यद्यपि अन्त्यमा भने प्रधानमन्त्री ओलीले आफूहरुको पुरानै अवस्थामा फर्किऔँ भन्ने प्रस्तावमा सहमति नगरेकाले वार्ता टर्रो भएको बताए । उनले भने– ‘सुरुवातमा राम्रो कुरा भयो । छुट्टिने बेलामा टर्रो कुरा भयो । यथास्थानमा रहने स्थिति बन्यो । सर्वोच्च अदालतले फैसला गरिसकेको अवस्थामा पूर्व एमालेको जुन पुरानो अवस्था हो, यो अवस्थामा पार्टीको संरचना, पदाधिकारी र सदस्य यथावत स्वीकार गर्ने स्थितिमा जाउँ भनी हामीले भन्यौ । पार्टीलाई एकताबद्ध बनाउँ, आन्दोलनलाई पनि अरु पार्टीलाई पनि समेटेर लैजाने काम गरौं भन्यौ । अरु कुरा भन्दा पनि २८ गतेको उहाँको आफ्नो सानो गुटको भेला हो, त्यसलाई उहाँले केन्द्रीय कमिटीको बैठकको नाम दिनुभएको छ । त्यसैमा कुरा मिलेन ।”
त्यस्तै, उपाध्यक्ष भीम रावलले पनि पछिल्लो अवस्थामै फर्किने प्रस्तवामा कुरा नमिलेको बताए । त्यसैगरी नेता रघुजी पन्तले भने संवादको अवस्था हुनु सरकात्मक भएको बताए । उता ओली पक्षका नेता सुवास नेम्वाङले पार्टी एकताबद्ध गरेर जाने भन्नेमा सबैको एकमत रहेको र पछिल्ला राजनीतिक विषयमा नेताहरुबीच मतान्तर रहेको बताए ।
