एमालेमा अध्यक्ष र महासचिव बाहेकका पद खारेज, मंसिरमा महाधिवेशन
नेकपा एमालेको केन्द्रीय कमिटी बैठकले अध्यक्ष र महासचिवबाहेकका सबै पद खारेज गर्दै महाधिवेशनको मिति तय गरेको छ । प्रधानमन्त्री निवास बालुवाटारमा आज बसेको बैठकले उपाध्यक्ष, उपमहासचिव, सचिवलगायत पद खारेज गरेको हो ।निर्णयसँगै अब एमालेमा अध्यक्ष र महासचिवबाहेक पदाधिकारी नहुने भएका छन् । पार्टी प्रवक्ताको जिम्मेवारी भने प्रदीपकुमार ज्ञवालीलाई तोकिएको छ । यसअघि नेकपाको दुई समुह हुँदा पनि उहालाई नै प्रवक्ताको जिम्मेवारी दिइएको थियो ।
बैठकले नेकपा माओवादी केन्द्रबाट एमालेमा आउनु भएका रामबहादुर थापा ‘बादल’ सहित २३ जना नेतालाई केन्द्रीय कमिटी सदस्य बनाउने निर्णय गरेको पार्टीका केन्द्रीय सदस्य सूर्य थापाले जानकारी दिनुभयो । योसँगै अब एमालेको केन्द्रीय कमिटी सदस्य सङ्ख्या दुई सय ६४ पुगेको छ ।
एमालेले सातै प्रदेशका इन्चार्ज पनि तोकेको छ । जसअनुसार बादललाई बागमती प्रदेश कमिटीको इन्चार्जको जिम्मेवारीसमेत दिइएको छ । प्रदेश १ मा सुवासचन्द्र नेम्वाङ, प्रदेश दुईमा सत्यनाराण मण्डल, प्रदेश चारमा पृथ्वीसब्बा गुरुङ, लुम्बिनीमा शंकर पोखरेल, कर्णालीमा यमलाल कडेँल र सुदूरपश्चिम प्रदेशमा लेखराज भट्टलाई इन्चार्ज बनाउने निर्णय गरेको छ । यसैबीच, एमालेको महाधिवेशन २०७८ मंसिरमा गर्ने निर्णय पनि बैठकले गरेको छ । पार्टीको १०औं महाधिवेशन आगामी मङ्सिर २ देखि ६ गतेसम्म गर्ने निर्णय भएको छ ।
