सरकारसँग वार्ता गर्न विप्लवको टोली गठन

सरकारसँग वार्ताको लागि नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले प्रवक्ता खड्गबहादुर विश्वकर्मा ‘प्रकाण्ड’ को नेतृत्वमा दुई सदस्य रहेको वार्ता टोली बनाएको छ । वार्ता टोलीका अर्का सदस्यमा उदय चलाउने ‘दीपक’ रहेको स्रोतले बताएको छ । यद्यपि वार्ता टोलीको आधिकारिक नाम भने सार्वजनिक गरेको छैन । सरकारले आजै गृहमन्त्री रामबहादुर थापा ‘बादल’ को नेतृत्वमा टोली गठन गरेलगत्तै विप्लव समूहले पनि वार्ता टोली बनाएको हो । टोलीमा रहेका सदस्य र वार्ताप्रतिको धारणाबारे केहीबेरमा विज्ञप्ति निकालेर सार्वजनिक गर्ने तयारी भइरहेको चन्द नेतृत्वको नेकपा उच्च स्रोतले नेपाल प्रेसलाई बताएको छ ।

‘विप्लव’ नेतृत्वकाे नेकपाले सरकारसँग वार्ताको लागि प्रकाण्डको नेतृत्वमा धर्मेन्द्र बास्तोला र चिरन पुन सदस्य रहेको तीन सदस्यीय कार्यदल बनाएको थियो । तर, धर्मेन्द्र हाल प्रहरी हिरासतमा रहेकाले वार्ता टोली सदस्यमा हेरफेर हुन लागेको बताइएको छ । ‘विप्लव’ नेतृत्वकाे नेकपाले वार्ताको लागि पार्टीमाथिको प्रतिबन्ध फुकुवा गर्नुपर्ने, पक्राउ परेका नेता/कार्यकर्ताको रिहाइ हुनुपर्नेलगायतका माग अघि सार्दै आएको छ ।