सात दिनभित्र अनधिकृत व्यापार व्यवसाय हटाउन महानगरको पत्रचार
काठमाडौं महानगरपालिकाले बसन्तपुर क्षेत्रका अनधिकृत व्यापार र प्रयोग ७ दिनभित्र हटाउन पुरातत्व विभागलाई महानगरको पत्रचार गरेको छ । वसन्तपुरको वारुणयन्त्र कार्यालयबाट उत्तरतर्फको भवन र तलेजु भवानी मन्दिर नजिकको भवनमा रहेका अनधिकृत व्यापार हटाएर ७ दिनभित्र जानकारी गराउन काठमाडौं महानगरपालिकाले पुरातत्व विभागलाई पत्र पठाएको हो । महानगरको सम्पदा तथा पर्यटन विभागले पत्र पठाएको हो ।
वसन्तपुरसहित काठमाडौंका विश्व सम्पदा क्षेत्रको सांस्कृतिक, ऐतिहासिक र पुरातात्विक महत्व जोगाउनु विभागको पनि दायित्व हो । पत्रमा भनिएको छ, बसन्तपुर क्षेत्रमा विभागले हेर्नु पर्ने स्थानहरु भोगचलन गरी भवनहरुमा पुरातात्विक महत्व विपरीत व्यापारिक प्रयोजनमा ल्याइएको जनगुनासो प्राप्त भएको छ ।
‘अनधिकृत व्यापार व्यवसाय तहाँ विभागले (७) सात दिनभित्र हटाइ यस कार्यालयलाई जानकारी गराउनु हुन अनुरोध छ । तोकिएको समयभित्र उल्लेखित अनधिकृत प्रयोजन नहटाइएमा यस कार्यालयबाट हटाइने व्यहोरासमेत मिति २०७७ फागुन १४ गतेको निर्णयानुसार अनुरोध छ ।’ पत्रमा भनिएको छ ।
स्थानीय सरकार सञ्चालन ऐन २०७४, काठमाडौं महानगरपालिका भवन निर्माण मापदण्ड २०७५ र प्राचीन स्मारक ऐन २०१३ समेतका कानुनी व्यवस्थाबमोजिम बसन्तपुर क्षेत्रका प्राचीन संरक्षण, मर्मत र जीर्णोद्धार गर्नुका साथै उक्त क्षेत्रमा सञ्चालित अनधिकृत व्यापार व्यवसाय हटाउनु यस कार्यालयको प्राथमिक योजनाभित्र पर्दछ । पत्रमा भनिएको छ, काठमाडौं महानगरपालिका उक्त क्षेत्रभित्र रहेका अनधिकृत व्यापारिक प्रयोजन हटाउने अभियानमा लागेको छ ।
