प्रमाण भेटीयो भने जो कोहीलाई पनि कारबाही गर्छु : अख्तियार प्रमुख राई
अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले प्रमाण भेटाए भने कारबाही गर्न पछि नहट्ने चेतावनी दिनु भएको छ । उहाले भ्रष्टाचार नियन्त्रणको कामलाई प्रभावकारी बनाउने बताउदै प्रमाण भेटिएमा जो कोही पनि कारवाहीमा दायरामा आउने बताउनु भएको हो ।
घट्टेकुलो समाजले शनिबार आयोजना गरेको स्वागत कार्यक्रममा प्रमुख आयुक्त राईले तथ्य र प्रमाणको आधारमा कुनैपनि भ्रष्टाचारीलाई कारबाही गर्न पछि नहट्ने स्पष्ट पार्नुभयो । ‘मेरो कार्यकालमा भ्रष्टाचारको तथ्य र प्रमाणका आधारमा कसैलाई पनि कारबाही गर्न पछि हट्ने छैन,’ उहाले भन्नुभयो, ‘तर निर्दोष व्यक्तिलाई फसाउन खोज्नेलाई पनि कारबाहीको दायरामा ल्याइनेछ ।’
नागरिक समाज र जनअपेक्षाअनुसार भ्रष्टाचार न्यूनीकरण र नियन्त्रणका लागि प्रभावकारी ढङ्गले काम गर्ने समेत उहाले बताउनु भयो । ‘नागरिक समाज र जनताले भ्रष्ट्राचारलाई नियन्त्रण गर्नुपर्यो भनिरहेका छन् । यहाँ धेरै भ्रष्टाचार व्याप्त छ भन्ने आवाज उठाइराख्नु भएको छ,’ उहाले अगाडी भन्नुभयो, ‘त्यो आवाजलाई मेरो कार्यकालमा विगतमा भन्दा प्रभावकारी ढंगले लैजाने प्रतिबद्धता व्यक्त गर्न चाहन्छु ।’
