नेकपा एउटै दल हो : निर्वाचन आयोग
निर्वाचन आयोगले नेपाल कम्युनिष्ट पार्टी (नेकपा) को विवादबारे थप निर्णय नगर्ने बताएको छ । कानूनी रुपमा नेकपा एउटै दल भएकाले आधिकारिकताबारे तत्काल थप कुनै निर्णय नगर्ने निष्कर्षमा आयोग पुगेको हो ।
प्रतिनिधिसभा विघटनको निर्णयसँगै राजनीतिक रूपमा विभाजित नेकपाबारे यसअघिकै निर्णयलाई निरन्तरता दिँदै आयोग आधिकारिकतासम्बन्धी विवादमा प्रवेश नगर्ने भएको हो ।
आधिकारिकताका लागि तोकिएको हदम्यादभित्र दुवै पक्षले दाबी नगरेको, राजनीतिक दलसम्बन्धी ऐन, नियमावली, पार्टी विधान एवं पार्टीको परिपत्रअनुसार कानूनी रूपमा नेकपा एउटै भएको र विधानअनुसार दुवै अध्यक्षको सहमतिमा महासचिवले डाकेको बैठक आधिकारिक हुने निर्णय आयोगले गत माघ ११ गते नै गरिसकेको छ ।
