हाम्रा जिज्यूबुबाले ल्याएको प्रजातन्त्र अहिले संकटमा छ : पूर्व राजा ज्ञानेन्द्र शाह
पूर्व श्री ५ ज्ञानेन्द्रले प्रजातन्त्र भनेको आवधिक निर्वाचन र दलविशेषका नेताहरूको शासन प्रणाली मात्र नभइ यो सामाजिक जीवन पद्धति भएको र हरेक नागरिकले प्राप्त गर्ने सन्तुलित खुशीमा मात्र प्रजातन्त्रको प्राण अटूट रहने धारणा सार्वजनिक गर्नुभएको छ ।
७१औँ राष्ट्रिय प्रजातन्त्र दिवसका अवसरमा शुभकामना सन्देश दिँदै उहाँले राष्ट्रको प्रतिष्ठा बढाउन हामी कति समर्थ भएका छौँ- सबैले मातृभूमिको पवित्र माटो छातीमा राखेर आत्मसमीक्षा गर्नुपर्ने बेला आएको औंल्याउनुभएको छ ।
नेपाल राष्ट्र जनता र राजाको सहमतिबाट खडा भएको र त्यसको अस्तित्व–रक्षा पनि सहमतिबाट मात्रै हुने यथार्थको अवज्ञासँगै निषेध र विभेदको राजनीति शुरु गरिएकोमा मुलुक दिन–प्रतिदिन जटिलतामा फस्दै गएको महसूस आम नेपालीले गरिरहेका भन्दै पूर्व श्री ५ ले चिन्ता प्रकट गर्नुभएको छ ।
शुभकामना सन्देशको आरम्भमा उहाँले भन्नुभएको छ– ‘सात दशकअघि फागुन ७ गतेका दिन नेपालमा प्रजातन्त्रको मिरमिरे घाम उदाएको हो । यसका निम्ति हाम्रा जिज्यूबुबा राष्ट्रपिता श्री ५ त्रिभुवन, अमर शहीदहरू तथा प्रजातन्त्रप्रेमी जनताको अथक योगदानप्रति हामी यस अवसरमा हार्दिक नमन गर्दछौँ ।’
‘प्रजातन्त्र आधुनिक शासन पद्धतिको सर्वोत्तम विधि व्यवस्था हो । विश्वमान्य प्रजातन्त्रको सिद्धान्तअनुरुप नेपालमा प्रजातान्त्रिक विधि-व्यवहार अघि बढोस् भन्ने हामी सबैको आकाङ्क्षा हो । प्रजातन्त्रप्राप्तिको सत्तरी वर्षपछि आएर पनि हामी अहिले प्रजातन्त्रकै विषयमा विवाद, द्वन्द्व र बहसमै व्यस्त छौँ, ग्रस्त छौँ । प्रजातन्त्रमा जनशक्ति र जनसम्मति नै विशिष्ट पक्ष हो । जनताको आस्था, चाहना र जनभावना अन्ततः अमिट रहन्छ, यसलाई मेट्न खोजेर, बटारेर त्यो मेटिँदैन, बटारिन्न ।’
