प्रतिनिधिसभा पुनःस्थापनाको एजेण्डा पार्टीले बोक्दैन : देउवा
नेपाली कांग्रेसले निर्वाचनमा जाने मुड बनाएको छ । केन्द्रीय कार्यसमितिको बैठकमा वरिष्ठ नेता रामचन्द्र पौडेलले प्रतिनिधिसभा पुनःस्थापनाको एजेण्डा लिएर जानुपर्ने बताएपनि सभापति शेरबहादुर देउवाले तत्कालै त्यसको प्रतिवाद गर्नुभयो ।
उहाले अदालतलाई कांग्रेसले आदेश दिन नसक्ने पौडेललाई स्पष्ट गरिदिनुभयो । पौडेल बोलेलगत्तै सभापति देउवाले प्रतिक्रिया दिदै प्रतिपक्षी पार्टीले अदालतलाई आदेश दिन नमिल्ने भन्दै पुनःस्थापनाको एजेण्डा पार्टीले नबोक्ने बताउनु भयो ।
‘संसद पुनःस्थापनाको एजेण्डा हामीले बोक्दैनौं । अदालतले जे भन्छ त्यही गर्नुपर्छ । चुनाव भन्यो भने चुनावमा जाने, पुनःस्थापना भयो भने संसदमा जाने,’ बैठकमा देउवाले भन्नुभयो । उहाले प्रतिपक्षी पार्टी निर्वाचनसंग डराउनुपर्ने कारण नरहेको समेत स्पष्ट पार्नुभयो ।
‘अदालतले चुनाव गर भन्छ भने हामी किन डराउने ? यदि ६ महिनामा चुनाव गरेन भने चै आन्दोलन गरौंला’, देउवाको भनाई थियो ।
