नयाँ गृहमन्त्रीको खोजी : ओली र गौतमबीच गोप्य छलफल
प्रधानमन्त्री केपी शर्मा ओलीले चुनावको लागि अनुभवी गृहमन्त्री नभएको भन्दै नयाँ गृहमन्त्रीको खोजी गरेका छन् । सोहि खोजी अन्तर्गत बालुवाटारमै बोलाएर पार्टीका उपाध्यक्ष तथा एकता अभियान सुरू गरेका वामदेव गौतमलाई चुनावी गृहमन्त्री बन्न अफर गरेको खुलेको छ ।
आइतबार प्रधानमन्त्री ओलीको विशेष निमन्त्रणामा बालुवाटार पुगेका एकता अभियानका संयोजक गौतमलाई चुनावी सरकारको गृहमन्त्री बन्न अफर आयो ।
बालुवाटारबाट पटकपटक उपप्रधानमन्त्री र गृहमन्त्री बन्ने अफर पाएका गौतम पार्टी अनौपचारिक रूपमा विभाजन हुँदापनि यस्तो अफर पाउने भाग्यमानि बनेका छन् । तर उनको योजना भने बेग्लै छ । उनी अब उपप्रधानमन्त्री हैन पार्टी एकता गराएर प्रधानमन्त्री नै बन्ने योजनामा छन् ।
स्रोतका अनुसार प्रधानमन्त्री ओलीले वैशाखमा जसरी पनि चुनाव गराउने र अनुभवी गृहमन्त्री खोजेको भन्दै चुनावी सरकारको उपप्रधानमन्त्री तथा गृहमन्त्रीको जिम्मेवारी सम्हाल्न गौतमलाई प्रस्ताव गरे ।
आइतबारको भेटमा ओली र गौतमबीच चुनाव र पार्टीको विषयमा डेढ घण्टा छलफल भएको स्रोतले दाबी गरेको छ । उक्त भेटमा प्रधानमन्त्री ओलीले गृहमन्त्री सम्हाल्न उनलाई निकै जोड गरेका थिए ।
गृहमन्त्रीबाट बादललाई हटाउने भएपछि प्रधानमन्त्रीले गौतमलाई बोलाएर यसबारे छलफल गरेको स्रोतको दाबी छ । चुनाव गराउने भन्दै तयारी सुरू गरेका प्रधानमन्त्री ओलीलाई गौतमको प्रश्न गरेको बुझिएको छ । उनले ओलीलाई असार ५ गतेभित्र निर्वाचन गर्न नसके को गर्ने सोंच छ भन्दै प्रश्न गरेका थिए ?
जवाफमा ओलीले वैशाखमा जसरी पनि चुनाव हुने दाबी गर्दै कुनै अन्यौल नराखी चुनावी सरकारको उपप्रधानमन्त्री तथा गृहमन्त्रीको जिम्मेवारी सम्हाल्न आउनुस् भन्ने प्रस्ताव दोहोर्याए ।
गौतमले प्रधानमन्त्रीसँग असार ५ गते संसद् विघटन गरेको ६ महिना पुग्छ, असार ५ गतेभित्र चुनाव गराउन नसके के गर्नुहुन्छ भनेर प्रश्न गरेको बताइएको छ । प्रधानमन्त्रीले भने पटकपटक बैशाखमै चुनाव गराएरै छाड्ने बताएका थिए ।
त्यतिमात्र होइन प्रधानमन्त्री ओलीले गौतमलाई तपाईंसँग चुनाव गराएको अनुभव पनि छ त्यसैले उपप्रधानमन्त्री र गृहमन्त्री बन्नुहोस् भनेर प्रस्ताव राखेका थिए ।
गौतमले भने अहिले आफू पार्टीलाई एक बनाउने अभियान थालेकाले दाँयाबाँया नलाग्ने बरू एकता गरेर प्रधानमन्त्री नै बन्ने बताएका थिए ।