राष्ट्रिय युवा संघ ओली पक्षको अध्यक्षमा तीन भाईको भिडन्त

 

नेकपा निकट राष्ट्रिय युवा संघको केपी ओली पक्षले आजबाट केन्द्रीय कमिटी बैठक बोलाएको छ । तत्कालीन माओवादी सम्बद्ध वाईसीएल नेपालको एउटा समूह समेत आजैबाट ओली पक्षीय युवासंघमा समाहित हुने भएको छ । बैठकअघि साबिक वाईसीएलका नेताहरुलाई समेत समेटेर केन्द्रीय कमिटी पुनर्गठनको छलफल भइरहेको युवा संघका नेताहरुले बताएका छन् । युवा संघका संयोजक रामप्रसाद सापकोटा प्रचण्ड-माधव पक्षमा रहेकाले उनलाई हटाएर नयाँ नेतृत्व चयन गर्न लागिएको युवा संघका इन्चार्ज महेश बस्नेतले बताए ।

ओली पक्षले युवा संघलाई बहुपदीय संरचनामा फर्काउने भएको छ । ६ वर्षदेखि महाधिवेशन नहुँदा धेरै नेताको उमेर ४० कट्न लागेकाले नेतृत्व विकासमै अवरोध भएको भन्दै अध्यक्ष, उपाध्यक्ष, महासचिवसहित पदाधिकारी चयन गरेर केन्द्रीय कमिटी विस्तार गर्न लागिएको हो । युवा संघको अध्यक्षका लागि हालका सहसंयोजक रमेश पौडेल, साबिक युवा संघका महासचिव किरण पौडेल र वचनबहादुर सिंहको दावी छ । रमेश नेकपा एकीकरणअघि तत्कालीन एमालेको युवा संघका अध्यक्ष थिए भने एकीकरणपछि सहसंयोजक छन् ।

रमेश अध्यक्ष भइसकेकाले उनलाई पार्टीमा जिम्मेवारी दिएर किरणलाई अध्यक्ष बनाउने प्रस्ताव महेश बस्नेतले गरेका छन् । तर रमेश र वचनले पनि आफूहरु ४० वर्ष पुग्न केही महिनामात्र बाँकी रहेकाले युवा संघको नेतृत्व गरेर बिदा हुन पाउनुपर्ने माग गरेका छन् । त्यस्तै महासचिवका लागि क्षितिज थेबेको दाबी छ भने पदाधिकारीमा अन्जना अधिकारी, अमित लामा, उर्मिला सुनुवार, प्रभातविक्रम कटवाल, रोशन बस्नेत लगायतको दावी छ ।

बादल पक्षका पूर्व वाईसीएल नेता बीबी तामाङको नेतृत्वको समूह पनि आन्तरिक छलफलमा छ । केन्द्रीय समितिमा रहेका करीव ४० जना पूर्व वाईसीएलसहितको टोलीलाई पदाधिकारीमा समेटेर नयाँ नेतृत्व चयन गर्न लागिएको स्रोतले जनाएको छ ।