ओलीले जंगली रुपमा राज्यसत्ता कब्जा गरे : प्रचण्ड
विभाजित नेकपाका अध्यक्ष तथा पूर्व प्रधानमन्त्री पुष्पकमल दाहाल प्रचण्डले प्रतिनिधिसभा विघटनसम्मका घटनासम्म आइपुग्दा के-के भयो र आफूहरुको भूमिका के थियो भन्ने बारेमा स्वेतपत्र जारी गर्ने बताएका छन् । आज विहान ललितपुरमा आयोजित पत्रकार सम्मेलनमा प्रचण्डले यसबीचमा किन दुर्घटना भयो भनर स्वेतपत्रको तयारी भइरहेको बताए ।
प्रचण्डले भने, ‘यसबीचमा किन दुर्घटना भयो, यसको श्वेतपत्र जारी गर्दैछौ जनतालाई प्रष्ट पार्न । हामी आत्मसमीक्षा पनि गर्छौं । हामी असक्षम र पलायन भएका होइनौं राष्ट्र निर्माण र लोकतन्त्र रक्षा र सत्यको लडाइँमा छौं। शान्ति प्रक्रियालाई संविधानमा रूपान्तरण गरेका हौं त्यसलाई अवमूल्यन गर्न हुन्न र या पदको लडाईको लागि आन्दोलन हैन भने बुझाउछौं ।’
प्रचण्डले केपी ओलीले राज्यसत्तालाई जंगली रुपमा कब्जा गरेर गुण्डाराज चलाउन थालेको आरोप समेत लगाए । अति भएर मात्रै आम हड्तालमा उत्रिनुपरेको उनले बताए । प्रचण्डले अब आम हड्ताल संयुक्त हुँदै गयो भने जनताले नै गर्ने दावी गरे ।
उनले भने, ‘केपीले राज्यसत्तालाई जंगली रूपमा ‘क्याप्चर’ गरे। संवैधानिक अंगका नियुक्ति र भूमि आयोगको कुराले गुण्डाराज देखियो तुरून्तै प्रतिवाद गर्नुपर्ने भयो र तत्काल आमहड्तालमा गयौ। जनताले साथ दिए ।’ ‘यदि नेकपाभित्र पद पाउने लडाइँ हुन्थ्यो भने यो देशका सबैभन्दा राम्रो ब्रेन यो प्रतिगमन नै हो भनेर आन्दोलनमा छन् । लोकतन्त्रको पक्षमा को छ कति छन् भनेर पो हेर्ने हो मान्छेको टाउको गन्ने होइन,’ प्रचण्डले थपे ।
