संवैधानिक इजलासमा आजबाट सुनुवाइ
प्रतिनिधिसभा विघटनविरुद्ध परेका मुद्दामा आजबाट सर्वाेच्च अदालतको संवैधानिक इजलासमा निरन्तर सुनुवाइ हुने भएको छ । नेकपा संसदीय दलका प्रमुख सचेतक देव गुरुङसहितले प्रतिनिधिसभा विघटन असंवैधानिक भन्दै दायर गरेकाे रिटमाथि संवैधानिक इजलासमा प्रारम्भिक सुनुवाइ भइसकेको छ ।
अदालतको आदेश अनुसार राष्ट्रपति, प्रधानमन्त्री र सभामुखले आआफ्नो लिखित जवाफ पेश गरिसकेका छन् । आजबाट निरन्तर सुनुवाइ हुने बताइएको छ । प्रधानन्यायाधीश चोलेन्द्र शमशेर जबराको अध्यक्षतामा गठित संवैधानिक इजलासमा न्यायाधीशहरु हरिकृष्ण कार्की, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसी सदस्य छन् ।
पक्ष र विपक्षका वकिलहरुको बहसपछि अदालतलाई सघाउन एमिकस क्युरी गठन भएको छ । एमिकस क्युरीमा वरिष्ठ अधिवक्ताहरु बद्रीबहादुर कार्की, सतिशकृष्ण खरेल, विजयकान्त मैनाली, पूर्णमान शाक्य र गीता पाठक संग्रौला छन् ।
यसैबीच रिट निवेदकहरुले प्रतिनिधिसभा विघटन विरुद्धको मुद्दा संवैधानिक इजलासबाट सर्वाेच्च अदालतको बहत् पूर्ण इजलासमा सुनुवाइका लागि सार्न माग गरेका छन् । आजको इजलासमा सो निवेदन दिइने रिट निवेदक वरिष्ठ अधिवक्ता दिनेश त्रिपाठीले बताए ।
