तोकिएकै समयमा निर्वाचन गराउन माग गर्दै सर्वोच्चमा पर्यो रिट
मन्त्रीपरिषद्को सिफारिसमा राष्ट्रपतिले प्रतिनिधिसभा विघटन र नयाँ निर्वाचनको मिति घोषणा गरेसँगै समयमै निर्वाचन हुनुपर्ने माग पनि चर्को बन्दै गएको छ ।
यसैबीच तोकिएकै समयमा निर्वाचन गराउनुपर्ने भन्दै सर्वोच्च अदालतमा रिट निवेदन समेत दायर भएको छ । अधिवक्ता दिपक विक्रम मिश्रले तोकिएको समयमै निर्वाचन हुनुपर्ने भन्दै हिजो सोमबार रिट दायर गरेका हुन् ।
निर्वाचनलाई प्रभावित पार्ने गतिबिधि नगर्नु÷नगराउनु अन्तरिम आदेशको माग गर्दै रिट दायर गरिएको छ । उक्त रिटको आज पेसी राखिएको छ ।
सरकारले प्रतिनिधि सभा विघटनका साथै वैशाख १७ र २७ गते दुई चरणमा निर्वाचन गराउने गरी गरेको सिफारिस राष्ट्रपति विद्यादेवी भण्डारीले अनुमोदन गरेकी थिइन् । निर्वाचनको विषयमा नेकपाभित्रै विवाद छ र पार्टी फुटको दिशातर्फ उन्मुख छ ।
तर, प्रतिनिधिसभा ब्युँताउनुपर्ने माग भइरहेका बेला तोकिएको समयमा निर्वाचन गराउनुपर्ने र निर्वाचन नै समस्या समाधानको विकल्प भएकोतर्फ पनि मानिसहरुको मत एकतृत हुन थालेको छ ।
