ओलीको मृत्युमा प्रचण्डले आफ्नो भविष्य देखे : मन्त्री भट्ट
उद्योगमन्त्री लेखराज भट्टले आफ्ना पूर्व कमाण्डर प्रचण्डप्रति कटाक्ष गर्दै केपी ओलीको मृत्युमा प्रचण्डले आफ्नो भविष्य देख्ने भूल गरेको आरोप लगाएका छन् ।
काठमाडौंको कोटेश्वरस्थित गौरीशंकर पार्टी प्यालेसमा ओली पक्षधर नेकपा रामेछाप–काठमाडौं सम्पर्क मन्चको भेलालाई सम्बोधन गर्दै भट्टले प्रचण्डमा पदको आशक्ति चुलिएपछि माधव नेपालको कुण्ठालाई क्यास गरेर ओलीमाथि अराजनीतिक आक्रमण गरेको आरोप लगाए ।
पूर्व माओवादी समूहका नेता भट्टले भने– केपी ओली मिर्गौला प्रत्यारोपण गरेर फर्किनुहुन्न भन्ने रहेछ । त्यसपछिमात्र उहाँले (प्रचण्ड)ले चलखेल थाल्नुभयो । केपी ओलीको मृत्युमा आफ्नो जीवन देख्ने भुल कमरेड प्रचण्डले गर्नुभयो ।
अधिकांश समय प्रचण्डको आलोचनामा खर्च गरेका भट्टले प्रचण्ड निर्माणको होइन ध्वंसको नेता हुन् भन्दै शान्ति प्रक्रियामै आइसकेपछि प्रचण्डले १० वटा सरकार गिराएको आरोप लगाए ।
भट्टले सभामुख अग्नि सापकोटाले कीर्ते गरेको आरोप समेत लगाए । पुस ५ गते अपरान्ह साढे ३ बजे प्रधानमन्त्रीविरुद्ध अविश्वास प्रस्ताव लिएर गएका प्रचण्ड माधव नेपालपक्षका सांसदको पत्रलाई सभामुखले कीर्ते गरेर साढे १० बजेको मिति राखेर दर्ता गर्न लगाएको भट्टको आरोप थियो ।
भेलामा पूर्व माओवादीतर्फका केन्द्रीय सदस्य कमल चौलागाई पनि ओली पक्षमा खुलेका थिए । प्रदेश सचिव आनन्द पोखरेल, केन्द्रीय सदस्य माधव ढुंगेललगायतको सहभागिता भेलामा रहेको छ ।
