नेकपा एमाले व्युँताउने बामदेव गौतमको गोप्य तयारी
नेकपा एमाले व्युँताउने बामदेव गौतमको गोप्य तयारी भैरहेको बिषेश स्रोतको दाबी छ । नेपाल कम्युनिस्ट पार्टी (नेकपा)को तेस्रो पक्ष आफूलाई दाबी गरेका उपाध्यक्ष बामदेव गौतमले एकीकरणलाई जोगाउने अभियान पनि थालेका छन्।
देशव्यापी रुपमा उनले आफूनिकट र आफ्नो मतमा सहमति जनाउने नेकपा नेता कार्यकर्तासँग अनौपचारिक छलफल थालेका हुन्। विभाजनका लागि प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्ड, माधवकुमार नेपाल बराबर दोषी रहेको उनको ठम्याई छ।
कम्युनिस्ट पार्टी विभाजनको पीडा आफूले बुझेको बताउँदै नमिलेको खण्डमा देशव्यापी रुपमा गौतमले जनताको बहुदलीय जनवादको नारालाई बलियो बनाउने तयारी पनि गरेका छन्। उनले सम्भवतः निर्वाचन आयोगमा दर्ता रहेको नेकपा एमालेलाई ब्युँताउने तयारी गरेका छन्।
निर्वाचन आयोगले नेकपाको आधिकारिकता ओली पक्षलाई दिएको खण्डमा प्रचण्ड पक्षले नेकपा एमालेको छातामा जाने निर्णय गरेको छैन। प्रचण्ड पक्षले नेकपाको आधिकारिकता पाए पनि ओली पक्षले एमाले लैजान नसक्ने भएपछि गौतमले यस्तो तयारी थालेकोस्रोतले जनाएको छ।
यदि सर्वोच्च अदालतले प्रतिनिधि सभा विघटनलाई सदर गरेको अवस्थामा भने दुई पक्षमा मात्र नेकपा विभाजन नभएर गौतमको अर्को समूह पनि बन्ने उनले बताइसकेका छन्।
