माओवादी चाहिएको हो भने माधव–झलनाथ फिर्ता गर : मन्त्री भट्ट
विभाजित नेकपाका स्थायी कमिटी सदस्य तथा उद्योगमन्त्री लेखराज भट्टले आफूहरुलाई प्रचण्डले अन्तिम बेलासम्म पनि पूर्व माओवादी जति सबै एकजुट हुनुपर्ने भनेर एकतामा आउन आग्रह गरेको बताएका छन् । बुधवार बबरमहलस्थित कार्की पार्टी प्यालेसमा आयोजित सुदूरपश्चिमका कार्यकर्ता भेलामा ओली पक्षीय नेकपाको प्रदेश इन्चार्ज समेत रहेका भट्टले प्रचण्डमा बैचारिक विचलन आएको आरोप लगाए ।
अध्यक्ष तथा प्रधानमन्त्री केपी ओलीलाई सामुन्ने राखेर उनले भने–प्रचण्डले मलाई वैचारिक बिचलन भएको भन्ने गरेका छन् तर उनी आफैंमा वैचारिक विचलन भएको हो । उनीहरु सडकमा गएर हामी यहाँ छौं भन्दैछन तर अहिले कहाँ छन् भनेर प्रचण्ड–माधव नेपाललाई खोज्ने बेला आएको छ ।
पूर्व माओवादी एकतामा जोड दिने प्रचण्डले पूर्व एमालेमा खेलेर पार्टी विभाजन गरेको भन्दै उनले आफूहरु प्रचण्डसँग जाने हो भने पूर्व एमालेका माधव नेपाल र झलनाथ खनाललाई फिर्ता गर्नुपर्ने बताए ।
भट्टले प्रचण्डले आफूलाई एक नम्बर दुश्मन ठानेको टिप्पणी गर्दै प्रचण्डले आफ्ना गुरुको सम्मान गर्न नजानेका बताए । भट्टले माधव नेपालमाथि हारेर नेता हुने बानी लागेको आरोप लगाए । उनले भने– प्रचण्ड यस्तो चेला हुन् जसले मोहन वैद्य जस्तो गुरुको सम्मान गरेनन् । जुन चेलाले गुरुको सम्मान गर्न स्क्दैन त्यसले कसैको सम्मान गर्न सक्दैन ।
