सूर्य चिन्हको मत लुटेर छोरी जिताउनेलाई सूर्य किन चाहियो : महेश बस्नेत
प्रचण्ड–माधव नेपाल पक्षले देशभर प्रधानमन्त्री केपी शर्मा ओलीको विपक्षमा प्रदर्शन गरिरहेका बेला बाँकेमा ओलीको पक्षमा युवाले प्रदर्शन गरेका छन् । ओली नेतृत्वको नेकपामा आबद्ध युवाहरुले मोटरसाइकल र्यालीसहित ‘केपी ओली जिन्दावाद’ भन्दै नारा लगाएका थिए ।
नेकपा नेता महेश बस्नेतको स्वागतमा विमानस्थल पुगेका कार्यकर्ताले प्रधानमन्त्रीको कदमको पक्षमा प्रदर्शन गरेका हुन् । सुर्खेतबाट नेपालगन्ज पुगेका बस्नेतले कोहलपुरमा आयोजित युवा भेलालाई सम्बोधन गरेका छन् ।
बस्नेतले निर्वाचनको तयारीमा जुट्नुपर्ने भन्दै सूर्य चिन्हमा प्रचण्डले आँखा चम्काउनु हास्यास्पद रहेको बताए । उनले हिजो सूर्य चिन्हमा खसेको मतपत्र च्यात्ने र सूर्य चिन्ह लिएर चुनाव लड्ने सम्झौताबाट भाग्नेहरुले आज सूर्यका लागि मरिहत्ते गरेको बताए ।
बस्नेतले भने–सिरहामा सूर्य चिन्हमा खसेको मतपत्र च्यातेर जित्ने प्रचण्ड, भरतपुरमा सूर्य चिन्हमा खसेको मत लुटेर छोरी जिताउने प्रचण्डलाई आज सूर्य किन चाहियो ?
