गण्डकी प्रदेशमा ओली पक्ष एक्लैको बहुमत
नेपाल कम्युनिष्ट पार्टी (नेकपा) दुई समूहमा विभाजन भएसँगै प्रदेश सरकारहरुमा पनि हलचल आइरहेको छ । प्रदेश २ बाहेकका प्रदेश सरकारहरु संकटमा परेको चर्चा भइरहेका बेला गण्डकी प्रदेश सरकार पनि सुरक्षित जोनमा पुगेको छ । त्यहाँ सरकारमा सहभागी भएको राष्ट्रिय जनमोर्चाले आफ्नो समर्थन कायमै राख्ने भएपछि पृथ्वीसुब्बा गुरुङको सो सरकार नढल्ने लगभग पक्का भएको छ ।
मुख्यमन्त्री सुब्बा केपी ओली निकटका नेकपा नेता हुन् । ‘संघीय संसद विघटन असंवैधानिक भएको र पार्टीले त्यसको विरोध गरिरहेको भए पनि प्रदेश सरकारलाई दिएको समर्थन भने यथावत राखेको हो । गण्डकी प्रदेशसभामा जनमोर्चाका २ जना प्रत्यक्ष र १ जना समानुपातिक सांसद छन् । त्यस्तै ओली समूहका २७ जना सांसद रहेका छन् ।
जनमोर्चाले साथ दिएपछि यो संख्या ३० पुगेको छ । अविश्वासको प्रस्तावका लागि १ चौथाइ सांसद संख्या चाहिन्छ । ६० सदस्सीय प्रदेश सभामा ३० जना ओली समूहलाई नै सहयोग गर्ने भएका हुन । गण्डकी प्रदेशमा १३ जना प्रचण्ड–नेपाल पक्षका सांसद छन् । जसमा १२ जना प्रचण्डका हुन भने १ जना नेपालका हुन् । प्रदेशमा १५ जना नेपाली कांग्रेसका सांसदहरु छन्, २ जना जनता समाजवादी पार्टीका सांसदहरु रहेका छन् ।
