टोपबहादुर रायमाझी र मणि थापा ओली क्याम्पमा
नेपाल कम्युनिष्ट पार्टी (नेकपा) अध्यक्ष केपी शर्मा ओली समूहले केन्द्रीय कमिटीमा नयाँ सदस्य थप गर्ने तयारी गरेको छ ।
कार्यकारी अध्यक्ष पुष्पकमल दाहाल र माधवकुमार नेपाल पक्षका नेतालाई कारबाही गरेर उक्त स्थानमा नयाँ सदस्य थप गर्ने ओली पक्षको तयारी छ ।
अहिले केही बेरमा प्रधानमन्त्री निवास बालुवाटारमा बस्ने केन्द्रीय समितिको बैठकले कारबाही तथा नयाँ सदस्य मनोनयनको निर्णय गर्ने बताइएको छ ।
यद्यपि, नयाँ सदस्यहरुको नाम सार्वजनिक गरिएको छैन । बैठकमा नयाँ सदस्यको नामावली प्रस्तुत गर्ने ओली समूहको तयारी छ । त्यसलगत्तै सपथग्रहण पनि हुने बताइएको छ ।
बैठक ९ बजेको लागि बोलाइए पनि अझै शुरु भएको छैन । केन्द्रीय सदस्यहरु बालुवाटार पुग्ने क्रम जारी छ ।
यसैबीच पूर्व माओवादी खेमाका टोपबहादुर रायमाझी र मणि थापा पनि बैठकमा सहभागी हुन बालुवाटार पुगेका छन् । यसअघि पूर्व माओवादी खेमाका लेखराज भट्ट मात्र ओली पक्षमा खुलेका थिए । रायमाझी र थापा दुवै पक्षका भेला र बैठकमा सहभागी थिएनन् ।
