प्रचण्डका घरबेटी शारदा अधिकारीको चोकचोकमा पोस्टर

 

कमलविनायकदेखि नगरकोटसम्मको सडक अलपत्र पारेपछि शारदाप्रसाद अधिकारीको पोस्टर चोक र सार्वजनिक सवारीमा टाँसेर स्थानीयले विरोधको नयाँशैली अपनाएका थिए । प्रचण्डका घरबेटी अधिकारीले जस्तै आयोजनाको ठेक्का लिएर ठेकेदारले अलपत्र पार्न थालेपछि सुदूरपश्चिमतिर पनि विरोधको यही रचनात्मक शैली अपनाउन थालिएको छ ।
हुलाकी सडक निर्माणको काम अलपत्र छाडेपछि स्थानीयले यसको जिम्मा लिएका ठेकेदारहरूको पोस्टर बनाएर बेलौरीको चोक–चोकमा टाँसेका हुन् । बेलौरीदेखि बेल्डाँडीसम्मको सडकको लम्बाइ २० किलोमिटर छ । गत वर्ष नै यो सडक निर्माण भइसकेको हुनुपथ्र्यो । तर  केही प्रतिशत मात्र पूरा भएको छ । अधिकांश काम बाँकी भए पनि अहिलेसम्म निर्माण कार्य थालिएको छैन ।

जिम्माअनुसारको काम नगरेपछि स्थानीयले निर्माणको ठेक्का लिएको सिद्धि शाही प्रकाश कन्स्ट्रक्सन र पटके ठेकेदारको पोस्टर बनाएर सार्वजनिक स्थानमा टाँसेका हुन् । ४ जना ठेकेदारको तस्बिरसहितको पोस्टरमा बुटाबारीदेखि बेलडाँडीसम्मको सडक निर्माण गर्ने ठेकेदार हराएको सूचना उल्लेख गरिएको छ ।

प्रकाशित मिति : २५ मंसिर २०७७, बिहिबार  १४ : ०१  बजे