ओली र प्रचण्ड मिल्न नदिने नेपालको यस्तो षड्यन्त्र
सत्तारुढ नेपाल कम्युनिष्ट पार्टी (नेकपा) का बरिष्ठ नेता माधवकुमार नेपालले दुई अध्यक्षबीच सहमति गरेर आफूहरुको अभियान नतुहाउन अध्यक्ष पुष्पकमल दाहाल, प्रचण्डलाई सचेत गराउनु भएको छ । पार्टीभित्रको बिवाद समाधान गरी एकतालाई मजबुत बनाउन बिभिन्न प्रयाश अघि बढेपछि बरिष्ठ नेता नेपालले अध्यक्षद्वय केपी शर्मा ओली र प्रचण्डबीच सहमति हुनसक्ने संभावना रहेको निश्कर्षसहित कुनै सहमति नगर्न धम्की दिनुभएको एक नेताले जनताटाइम्सलाई जानकारी दिए ।
नेकपाको सचिवालय बैठक आज बस्दैछ । बैठकअघि प्रधानमन्त्री तथा अध्यक्ष केपी शर्मा ओली र अध्यक्ष प्रचण्डले राष्ट्रपति बिद्यादेवी भण्डारीसँग समेत छुट्टाछुट्टै परामर्श गर्नुभएको छ भने दुई अध्यक्ष निकट नेताहरु सहमति जुटाउन लगातार गृहकार्यमा हुनुहुन्छ । गृहकार्य चलिरहेकै बेला नेता नेपालले अव ओलीसँग सहमति होइन, बहुमतका आधारमा निर्णय गरी दुवै पदबाट हटाउने अडानमा हुनुहुन्छ । नेता नेपालमा ओली हटाएर अध्यक्ष वा प्रधानमन्त्रीमध्ये एक पदमा आफू हुने मनोकांक्षा रहेको छ । नेकपाको बिधानमा महाधिवेशनअघि अध्यक्ष हटाउने कुनै ब्यवस्था नभए पनि नेपाल कू गरेर आफू स्थापित हुने अभियानमा हुनुहुन्छ । यहीकारण अव ओलीसँग सहमति नगर्न नेपालले प्रचण्डलाई धम्की दिनुभएको स्रोतले बतायो ।
‘माधव कमरेडले परिणाम जस्तोसुकै भए पनि भोग्न तयार रहने जनाएर ओलीसँग सहमति नगर्न आफ्नो बटमलाइन प्रचण्डलाई सुनाउनु भएको छ, दुई अध्यक्षबीच सहमति भए आफूले नमान्ने र ओलीलाई दुवै पदबाट हटाउनै पर्ने उहाँको कुरा छ,’ प्रचण्ड निकट रहेका नेकपा स्थायी कमिटीका एक सदस्यले जनताटाइम्ससँग भने । बरिष्ठ नेता नेपाल पार्टी एकताकै बेलादेखि आफ्नो छुट्टै समुह रहेकोले ओली र प्रचण्डबीचको सहमतिलाई नमान्ने धम्की दिँदै आउनुभएको थियो । दुवै पक्षका नेताहरु पार्टी एकता बचाउन दुवै अध्यक्षको संयुक्त दस्तावेजका लागि प्रयाशरत रहेपनि नेपाल र उहाँ पक्षधर नेता भने अध्यक्ष मिलेर कहाँ हुन्छ ? भन्दै प्रचण्डलाई घेरावन्दीमा राख्ने प्रयाशमा रहेको ती नेताले बताए ।
