प्रधानमन्त्री चाहिने भए ओलीले अध्यक्ष पद छाड्नैपर्छ : देवेन्द्र पौडेल
नेपाल कम्युनिस्ट पार्टी (नेकपा) स्थायी कमिटी सदस्य देवेन्द्र पौडेलले पार्टीभित्रको समस्या समाधानका लागि प्रधानमन्त्री केपी शर्मा ओलीले अध्यक्ष वा प्रधानमन्त्रीमध्ये एक पद छाड्नैपर्ने बताएका छन् ।
पौडेलले एक पद छाड्नेबाहेकमा कुनै सम्झौता नहुने समेत स्पष्ट पारेका छन् । एक साक्षात्कारमा बिहीबार उनले पार्टीभित्रको समस्यालाई निकास दिनका लागि ओलीले पार्टी अध्यक्ष वा प्रधानमन्त्रीमध्ये एक पद मात्र लिनुपर्ने बताएका हुन् ।
‘ओली प्रधानमन्त्री रहने भए अध्यक्ष छोड्नुपर्छ । एक पद मात्रै लिनुपर्छ । अब ओलीसँग सम्झौता हुँदैन’, पौडेलले भने, ‘पार्टीलाई फुटको दिशातर्फ लैजाने काम कसैले पनि गर्न हुँदैन । पार्टी फुटाउनु हुँदैन, एक बनाउनैपर्छ ।’
पार्टीको विधान र पद्धतिअनुसार ओली अघि बढेको खण्डमा विवाद समाधान हुने पौडेलको भनाइ छ । उनले ओलीले पार्टीको निर्णय मान्नुपर्ने भन्दै पार्टीले सरकार चलाउने कुरा स्वीकार गर्नुपर्ने बताए । ‘पार्टीभित्र निकास दिन अध्यक्ष ओलीले भूमिका खेल्नुपर्छ’, पौडेलले भने । पार्टी विवादको समाधान जतिसक्दो निकाल्नुपर्नेमा उनको जोड छ ।
नेकपा विवादले संकटपूर्ण अवस्था सृजना गरेको भन्दै उनले अब समस्या समाधान गर्ने जिम्मा ओलीले लिनुपर्ने पनि बताएबा छन् । सचिवालय बैठकमा पेश भएको दुवै अध्यक्षको प्रतिवेदनमाथि गहन छलफल गरेर मात्रै निकास निस्कने उनको भनाइ छ । त्यसका लागि ओली तयार हुनुको विकल्प नभएको पौडेलले बताए ।
दुबै अध्यक्षको प्रतिवेदनलाई छलफलको विषय बनाउँदा नै विवाद समाधानको उपाय भेटिने उनको तर्क छ ।
प्रतिवेदन खारेज वा फिर्ताको माग उचित नभएको समेत उनले उनले बताए । छलफलपछि बरु संयुक्त प्रतिवेदन बनाउन सकिने भन्दै उनले ओली र दाहालबीच मिल्नुको विकल्प नभएको समेत बताएका छन् ।
